Memleket basshysy Qaýipsizdik Keńesi men onyń Apparaty týraly erejeni bekitti
ASTANA. KAZINFORM — Prezıdent Qasym-Jomart Toqaev «Qazaqstan Respýblıkasy Qaýipsizdik Keńesi Apparatynyń keıbir máseleleri jáne Qazaqstan Respýblıkasy Prezıdentiniń keıbir aktilerine ózgerister men tolyqtyrýlar engizý týraly» Jarlyqqa qol qoıdy, dep habarlaıdy Aqordanyń baspasóz qyzmeti.
Jarlyqqa sáıkes, Qaýipsizdik Keńesi men onyń Apparaty týraly ereje bekitilip, Qazaqstan Respýblıkasy Qaýipsizdik Keńesi Tóraǵasy orynbasarynyń ókilettilikteri aıqyndaldy.
Qaýipsizdik Keńesi men onyń Apparatyna jahandyq syn-qaterlerge, ishki ahýaldyń ózekti aspektilerine jan-jaqty taldaý júrgizý mindeti júkteldi.
Qaýipsizdik Keńesi Tóraǵasy orynbasarynyń quzyryna Qaýipsizdik Keńesi Tóraǵasynyń aktileri men tapsyrmalarynyń, Qaýipsizdik Keńesi sheshimderiniń, sonyń ishinde shuǵyl otyrystarynda qabyldanǵan sheshimderdiń múltiksiz ári tolyq oryndalýyn baqylaý, sondaı-aq ulttyq qaýipsizdikti qamtamasyz etý, eldiń qorǵanys qabiletin arttyrý, zań men tártipti saqtaý salalaryndaǵy is-sharalardy júzege asyratyn memlekettik organdar men uıymdardyń qyzmetin úılestirý kiredi.
Qaýipsizdik Keńesi Tóraǵasynyń orynbasary aqparattyq jáne kıberqaýipsizdik, sonyń ishinde jasandy ıntellektini qoldaný, derbes derekterdi qorǵaý, sybaılas jemqorlyq pen ekonomıkalyq qylmysqa qarsy is-qımyl, azamattyq qorǵanys máselelerimen aınalysady.
Budan bólek, Qaýipsizdik Keńesi Tóraǵasynyń orynbasary joǵaryda atalǵan sharalardy iske asyratyn memlekettik organdar men uıymdardyń qyzmetin úılestirip, halyqaralyq baılanys ornatady, sondaı-aq Qaýipsizdik Keńesi Apparatynyń qyzmetin uıymdastyrady.
Qaýipsizdik Keńesiniń Apparaty óz aldyna derbes memlekettik organ retinde Prezıdentke tikeleı baǵynady jáne esep beredi. Organ ulttyq qaýipsizdik salasyndaǵy táýekelderdi baqylaý isin jetildirý jáne kúsheıtý, memleketti basqarýdyń ornyqtylyǵyn qamtamasyz etý, Qaýipsizdik Keńesi Tóraǵasy men Qazaqstan Respýblıkasy Qaýipsizdik Keńesi qyzmetine ınstıtýtsıonaldyq turǵydan qoldaý kórsetý jáne olardyń sheshimderin oryndaý sharalarymen aınalysady.
Bul mindetter Qazaqstan Respýblıkasynyń egemendigi men táýelsizdigin, aýmaqtyq tutastyǵyn, halyqaralyq arenadaǵy ulttyq múddeleri men konstıtýtsııalyq júıeniń negizderin saqtaýdy kózdeıdi.
Eske salsaq, jaqynda Memleket basshysynyń jarlyǵymen Aıda Ǵalymqyzy Balaeva Qazaqstan Respýblıkasy Qaýipsizdik Keńesi Tóraǵasynyń orynbasary laýazymyna taǵaıyndaldy.
Buǵan deıin Qasym-Jomart Toqaev 12-13 qyrkúıek kúnderi BRIKS XVIII sammıtine qatysý úshin Úndistanǵa baratyny belgili boldy.
