Memleket basshysy Qatar memleketiniń elshisi Abdalla ben Hýseın Djaberdi qabyldady
ASTANA. KAZINFORM – Áńgimelesý barysynda Qasym-Jomart Toqaev Qatardy Qazaqstannyń ortaq maqsattar men murattar biriktiretin eń jaqyn seriktesteriniń biri retinde atady.
Memleket basshysy keıingi jyldary Qazaqstan men Qatar ekijaqty jáne kópjaqty kún tártibiniń barlyq baǵyty boıynsha eleýli tabysqa qol jetkizgenine nazar aýdardy. Buǵan qosa, eki el berik quqyqtyq baza qalyptastyrdy jáne birqatar iri ınvestıtsııalyq jobany júzege asyrdy.
Qasym-Jomart Toqaev Astanada ótetin ShYU sammıtin qoldap, qurmetti qonaq retinde qatysýǵa nıet tanytqany úshin Qatar Ámiri sheıh Támım ben Hamad Ál Tánıge rızashylyǵyn bildirdi.
Óz kezeginde Qatar elshisi Abdalla ben Hýseın Djaber qurmet kórsetkeni úshin Qasym-Jomart Toqaevqa alǵys aıtyp, Dohanyń eki el arasyndaǵy san qyrly yntymaqtastyqty odan ári qarqyndy damytýǵa beıildi ekenin jetkizdi.
Sonymen qatar kezdesýde ekijaqty kún tártibindegi ózekti máseleler, sonyń ishinde saýda-ekonomıka, energetıka jáne densaýlyq saqtaý salalaryndaǵy yqpaldastyq perspektıvasy talqylandy.
