Prezıdent Quryltaı saılaýynyń qarsańynda qazaqstandyqtarǵa úndeý jasady

- Qurmetti otandastar!

Aldaǵy jeksenbi kúni elimizde jańa birpalataly Quryltaıdyń alǵashqy saılaýy ótedi. Bul – ult taǵdyryna tikeleı áser etetin tarıhı oqıǵa.

Elimiz sońǵy jyldary aýqymdy reformalardy júzege asyryp, jarqyn bolashaqqa batyl qadam basyp keledi. Biz birlik pen kelisimniń jáne yntymaqtyń arqasynda Ádiletti Qazaqstandy qurý isinde zor jetistikke jettik. Halyq Konstıtýtsııasy kúshine endi, elimizdiń damý baǵdary ózgerdi. Degenmen atqaratyn jumys áli de kóp.

Bul saılaý halqymyzdyń ıgiligine qyzmet etetin tyń reformalarǵa bastaý bolyp, qazirgi Qazaqstan jylnamasyndaǵy jańa kezeńge jol ashady.

Men partııalardyń barlyǵy daıyndyq jumystaryn tıisti deńgeıde júrgizýi úshin Quryltaı saılaýy ótetin ýaqytty erterek habarladym.

Sondyqtan Quryltaıdyń alǵashqy saılaý naýqany mazmundy, ashyq, básekege toly ári órkenıetti sıpatta ótti. El azamattarynyń saılaý týraly pikiri osyndaı boldy.

Bul saılaý el tarıhyndaǵy eń tartysty naýqandardyń biri retinde este qalatyny anyq. Partııalar saılaýshylarmen kezdesý kezinde, sondaı-aq aqparattaǵy úgit-nasıhat, jalpyulttyq teledebattar, áleýmettik jelidegi pikirtalastar barysynda óz baǵdarlamalaryn keńinen ári dáıekti túrde tanystyrdy.

Bir sózben, azamattarymyz partııalardyń el bolashaǵyna qatysty ustanymyn muqııat zerdeleýge múmkindik aldy. Saıası uıymdardyń ekonomıkadan bastap mádenıet salasyna deıin qamtyǵan bastamalaryn baǵalap-baǵamdady.

Saılaýaldy naýqan elimizdegi qoǵamdyq kún tártibi ózgergenin, jasampazdyq pen órkendeý ıdeıasy memleket saıasatynyń arqaýyna aınalǵanyn aıqyn kórsetti.

Jurt aldyna jańa tulǵalar shyqty, utymdy usynystar aıtyla bastady. Bul – túbegeıli saıası jańǵyrýmen qatar, ultymyzdyń qaıta jandanǵan passıonarlyq qýatyn tanytatyn mańyzdy nyshan.

Qoǵamdyq pikirtalasqa jastarymyz, kásibı qaýymdastyq ókilderi men kásipkerler de belsendi qatysty. Memleket basshysy retinde barshańyzǵa zor rızashylyǵymdy bildiremin.

Jalpy, halqymyzdyń saıası mádenıeti artyp, jurtymyz memlekettik basqarý isine atsalysa bastady. Bul biz bir el bolyp júrgizgen reformalardyń tikeleı nátıjesi ekeni sózsiz.

Azamattarymyz qasterli Otanymyzdyń taǵdyryna shynaıy janashyrlyq tanytyp, elimizdiń keleshegine jaýapty ekenin tereń sezinýge tıis. Sonda ǵana Qazaqstan odan ári qaryshtap damıdy.

Saılaý naýqany otandyq jáne halyqaralyq baıqaýshylardyń jiti nazarynda boldy. Olar daýys berý kúni de ýchaskelerde bolady.

Biz «Zań men Tártip» qaǵıdaty ústemdik quratyn, halyq únine qulaq asatyn, saıası jáne qoǵamdyq ınstıtýttary tıimdi jumys isteıtin memleket quryp jatyrmyz.

Jalpyhalyqtyq daýys berýdiń qorytyndysy boıynsha Quryltaıǵa kásibı mamandar men otanshyl azamattar saılanady dep kámil senemin.

Quryltaı áralýan kózqaras pen ult keleshegi jolyndaǵy umtylystar toǵysatyn birtutas alań bolýǵa tıis. Osylaısha, Quryltaı el jańǵyrýyna tyń serpin beretin qurylymǵa aınalmaq.

Biz geosaıası shıelenis shıryǵyp, jahandyq syn-qaterler kúsheıe túsken kezeńde bet alǵan baǵytymyzdan taımaı, tek alǵa qaraı júrýimiz qajet. Qazaqstandy álemdegi naǵyz ozyq memleketterdiń qataryna qosý úshin aýqymdy jumys atqarýymyz kerek, ıaǵnı ulttyq strategııamyzdy tabysty júzege asyrýymyz qajet.

Adamdar kóp jaǵdaıda qabyldanǵan mańyzdy sheshimderdiń shynaıy qundylyǵyn jyldar ótken soń ǵana túsinedi. Aldaǵy jeksenbi el taǵdyry úshin dál osyndaı betburysty sát bolady.

Biz Qazaqstan tarıhyndaǵy jańa kezeńge qadam basamyz. Osyndaı taǵdyrsheshti sátte ár adamnyń daýysy mańyzdy ekeni sózsiz.

Qurmetti otandastar, elimizdiń keleshegi ár azamattyń sanaly tańdaýyna baılanysty bolmaq.

Saılaýǵa qatysý degenimiz – halyqtyń óz yqtııaryn bildirý, el taǵdyryna beı-jaı qaramaı, azamattyq jaýapkershilik tanytý, el ıgiligi úshin ónegeli is jasaý degen sóz. Dúnıe júzinde mıllıondaǵan adam óz saılaý quqy úshin kúresýde.

Qazaqta «Kelisip pishken ton kelte bolmas» degen maqal bar. Azamattardy, ásirese, jastardy saılaýǵa kelip, óz tańdaýyn jasaýǵa, ıaǵnı Qazaqstannyń tabysty damýyna úles qosýǵa shaqyramyn.

Halqymyzdyń daýysy qasterli Otanymyzdyń tuǵyryn bekemdeýge, naǵyz ozyq el bolýymyzǵa tikeleı yqpal eteri anyq.

Barshańyzǵa amandyq jáne tabys tileımin!

Otanymyz – Qazaqstan Respýblıkasy jasasyn! - delingen úndeýde.

Aıta keteıik, Qasym-Jomart Toqaev Quryltaı saılaýy qarsańynda Qazaqstan halqyna úndeý jasaıtyny habarlandy.