Memleket basshysy Qasym-Jomart Toqaev Jeńis kúnimen quttyqtady
ASTANA. KAZINFORM — Prezıdent Ekinshi dúnıejúzilik soǵys kezinde mıllıondaǵan otandasymyz janqııarlyqpen shaıqasyp, aıanbaı jumys istep, áskerdi kerek-jaraqpen qamtamasyz etkenin aıtty, dep habarlaıdy Aqordanyń baspasóz qyzmeti.
Toqaev atap ótkendeı, júzden astam jerlesimiz «Dańq» ordeniniń tolyq kavaleri atandy, bes júz adam Batyr ataǵyn aldy, ondaǵan myń azamat jaýyngerlik erligi jáne qajyrly eńbegi úshin marapattaldy.
— Qymbatty otandastar! Sizderdi Jeńis kúnimen shyn júrekten quttyqtaımyn! Búgin biz maıdan dalasynda Otan úshin ot keship, erlik jasaǵan jaýyngerlerge jáne tylda tabandy eńbek etken ardagerlerge shynaıy rızashylyq sezimmen taǵzym etemiz. Qasiretti jyldardyń barlyq aýyrtpalyǵyn qaıyspaı kóterip, Jeńiske jetken aǵa býynǵa aıryqsha qurmet kórsetemiz. Elimiz ortaq Jeńiske ólsheýsiz úles qosty. Ekinshi dúnıejúzilik soǵys kezinde mıllıondaǵan otandasymyz janqııarlyqpen shaıqasty, aıanbaı jumys istep, áskerdi kerek-jaraqpen qamtamasyz etti. Júzden astam jerlesimiz «Dańq» ordeniniń tolyq kavaleri atandy, bes júz adam Batyr ataǵyn aldy, ondaǵan myń azamat jaýyngerlik erligi jáne qajyrly eńbegi úshin marapattaldy. Biz aǵa býynnyń óshpes dańqyn eshqashan umytpaımyz, — dedi Prezıdent.
Memleket basshysynyń sózinshe, jaýjúrek sardarlar men sarbazdardyń qurmetine memorıaldar ornatyldy, kitaptar shyǵarylyp, fılmder túsirildi, sondaı-aq kóshelerge, mektepterge, mýzeılerge, áýejaılarǵa, áskerı bólimder men ınstıtýttarǵa el qorǵaǵan erlerdiń esimi berilip jatyr. Qaharman ardagerlerimizdiń eren erliginiń mán-maǵynasyn óskeleń urpaqtyń sanasyna sińirý — búgingi býynnyń qasıetti paryzy.
— Biz erjúrek maıdangerlerdiń qaıtpas qaısarlyǵy men asqaq rýhynyń arqasynda derbes ári beıbit elde ómir súrip kelemiz, sondaı-aq, tól mádenıetimizdi damytyp, qazirgi zamannyń ıgiligin sezinip otyrmyz. Qazaqstandy búkil álem biledi jáne qurmetteıdi. Biz jańa Konstıtýtsııa erejelerine sáıkes Ádiletti Qazaqstandy quryp jatyrmyz. Ata zańymyz eshkimdi ultyna, nanym-senimine qaraı bólip-jarmaıdy, barlyq azamattyń quqyqtary men bostandyqtaryn birdeı qorǵaıdy. Uly Jeńis kúni — eń aldymen, jaýyngerlik erligi men jigerli eńbeginiń arqasynda mamyrajaı zamanǵa jetkizgen batyrlarymyzdyń esimin el jadynda jańǵyrtý kúni. Bul — ulan-asyr toıǵa emes, mándi ári maǵynaly oıǵa shaqyratyn mereke. Halqymyzdyń beıbit ómirge jáne ósip-órkendeýge umtylysynyń aıqyn kórinisi ispettes kók baıraǵymyz árdaıym ashyq aspan astynda jelbiresin! Uly Jeńis kúni qutty bolsyn! — dedi Toqaev.
Aıta keteıik, keshe Memleket basshysy Qasym-Jomart Toqaev Máskeý qalasyna jumys saparymen bardy. Prezıdent Uly Jeńistiń 81 jyldyǵyna arnalǵan saltanatty is-sharalarǵa qatysady.
Jumys sapary aıasynda Qasym-Jomart Toqaev Vladımır Pýtınmen kezdesý ótkizgenin jazdyq.
