Memleket basshysy Qasym-Jomart Toqaev «Tazarý kúnine» oraı úndeý joldady
ASTANA. KAZINFORM — Búgin «Tazarý kúnine» oraı elimizdiń ár túkpirinde «Taza Qazaqstan» jalpyulttyq jobasynyń jańa kezeńine jol ashatyn aýqymdy ekologııalyq aktsııa bastaldy, dep habarlaıdy Aqordanyń baspasóz qyzmeti.
Prezıdent atap ótkendaı, bul — Naýryznama onkúndiginde aıryqsha oryn alatyn kún.
— Qoǵamymyzdyń jańǵyrýy kúlli tabıǵattyń jańarýymen tuspa-tus kelip otyr. Ýaqyt pen irgeli ózgeristerdiń osylaı úndesýi barshamyzǵa Otanymyzdyń ıgiligi jolynda aıanbaı eńbek etýge aıryqsha kúsh-jiger beretini sózsiz. Respýblıka aýmaǵynda «Móldir bulaq» bastamasyn jappaı júzege asyrý qolǵa alyndy. Bul joba aıasynda bulaqtardyń kózin ashyp, tal egý, jaǵalaýlar men sý aıdyndaryn, aýlalar men saıabaqtardy tazalaý jumystary jalǵasa beredi, — dedi ol.
Memleket basshysy Naýryz meıramy kezinde qabyldanǵan Jańa Halyq Konstıtýtsııasynda azamattarymyzdyń tabıǵatqa qamqorlyqpen qaraýy ulttyq dúnıetanymymyzdyń basty qaǵıdatynyń biri retinde aıqyndalǵanyn aıtty.
— Jańa Halyq Konstıtýtsııasy el birliginiń arqaýy, rýhanı jáne quqyqtyq baǵdarymyz ári Táýelsizdigimizdiń myzǵymas tuǵyry bolatyny kúmánsiz. Ata zańymyz qoǵamda dúnıetanymymyz ben bitim-bolmysymyzdyń ózegi sanalatyn yntymaq, jaýapty ári jasampaz otanshyldyq, sondaı-aq «Taza Qazaqstan» qundylyqtaryn qalyptastyrady. «Taza Qazaqstan» ıdeologııalyq tujyrymdamasynyń túpki máni kóshelerdi, aýlalardy jáne aınalamyzdy taza ustaýdan ǵana emes, Qazaqstan azamattarynyń ál-aýqatyn arttyrýǵa bastaıtyn nıet pen peıildiń tazalyǵynan kórinis tabady, — dedi Toqaev.
Prezıdent qazir tabıǵat ıgilikterin uqypty paıdalaný jáne sanaly tutyný jolyn tańdaǵan azamattarymyzdyń sany artyp kele jatqanyn alǵa tartty.
— Otandastarymyzdy Tazarý kúnimen quttyqtaımyn! Qazir tabıǵat ıgilikterin uqypty paıdalaný jáne sanaly tutyný jolyn tańdaǵan azamattarymyzdyń sany artyp keledi. Bul — jarqyn bolashaǵymyzǵa kepil bolatyn ıgi úrdis. Men búkil halqymyzdy tazalyq pen tártip estafetasyna belsene qatysýǵa shaqyramyn. Bárimiz kúsh biriktirsek, elimizdi bıik belesterge jetelep, Ádiletti, Taza, Órkendegen Qazaqstandy qura alamyz. Barshańyzǵa amandyq jáne baq-bereke tileımin! — dep túıindedi ol.
Budan buryn Memleket basshysy Naýryz merekesine qatysqanyn jazǵan edik.
