Memleket basshysy Qarjylyq monıtorıng agenttiginiń tóraǵasyn qabyldady
ASTANA. KAZINFORM — Memleket basshysy Qarjylyq monıtorıng agenttiginiń tóraǵasy Dmıtrıı Malahovty qabyldady.
Dmıtrıı Malahovtyń baıandamasynan:
— qylmystyq jolmen túsken kiristerdi jylystatýǵa qarsy kúres salasynda 5,7 myńnan astam tutynýshymen iskerlik qarym-qatynas toqtatylǵan;
— krıptovalıýta aıyrbastaıtyn 1,5 myńnan asa zańsyz onlaın-servıs anyqtalyp, buǵattalǵan;
— 49 zańsyz maıner áshkerelengen. Qazir olarǵa qatysty tekserý jumysy júrgizilip jatyr;
— terrorıstik jáne ekstremıstik uıymdardyń shottaryna qarjy aýdarýǵa qatysty 1,2 myń áreket anyqtalyp, olarǵa shekteý qoıylǵan.
— 41 qarjy pıramıdasy joıylyp, zardap shekkenderge 4,6 mıllıard teńge qaıtarylǵan;
— alaıaqtyq belgileri bar 8 myńnan astam saıt pen akkaýnt buǵattalyp, 4,8 myń onlaın-kazıno saıtynyń qyzmeti toqtatylǵan;
— ekinshi deńgeıli banktermen jáne qarjy retteýshilerimen birlesip, 21 jasqa tolmaǵan azamattardyń býkmekerlik keńselerge tólem jasaý múmkindigin avtomatty túrde shekteý tetigi engizilip jatyr;
— 74 mıllıard teńge kóleminde negizsiz bıýdjet shyǵyndarynyń aldyn alyp, zańsyz qolma-qol aqshamen aınalysatyn 59 «kóleńkeli» alań qyzmeti toqtatylǵan, sondaı-aq 7 uıymdasqan qylmystyq top joıylǵan jáne sotqa deıingi tergeý amaldarynyń aıasynda 141 mıllıard teńge kóleminde keltirilgen zalal ótelgen.
Sonymen qatar kapıtaldy zańsyz shyǵarýǵa qarsy is-qımyl salasynda jalpy somasy 276 mıllıard teńgeni quraıtyn aktıvter qaıtarylǵan.
Agenttik aldaǵy ýaqytta zańsyz shyǵarylǵan aktıvterdi qaıtarý jáne adal kásipkerlerdiń isine aralaspaı, «kóleńkeli» ekonomıkadaǵy qylmystardyń jolyn kesý jumystaryna basa mán beredi.
Qarjylyq monıtorıngti damytý tujyrymdamasyn jáne Kóleńkeli ekonomıkaǵa qarsy is-qımyl jónindegi keshendi jospardy iske asyrý, jylystatý júıesin FATF (aqshany jylystatýǵa qarsy kúrestiń qarjylyq sharalaryn ázirleý toby) halyqaralyq standarttaryna tolyq sáıkestendirý úshin sharalar qabyldanady.
Qasym-Jomart Toqaev adal bıznesti qorǵaý sharalaryn kúsheıtý qajet ekenin erekshe atap ótip, agenttik qyzmetiniń negizgi baǵyttary boıynsha jumystardy jalǵastyrýdy tapsyrdy.
