Memleket basshysy Qarjy naryǵyn retteý jáne damytý agenttiginiń tóraǵasyn qabyldady
ASTANA. KAZINFORM – Prezıdent Qasym-Jomart Toqaev Qarjy naryǵyn retteý jáne damytý agenttiginiń tóraǵasy Mádına Ábilqasymovany qabyldady. Memleket basshysyna qarjy naryǵyn damytý salasynyń byltyrǵy qorytyndylary týraly esep berildi. Bul týraly Aqordanyń baspasóz qyzmeti habarlady.
Qasym-Jomart Toqaevqa bank sektorynda turaqtylyq saqtalyp turǵany jóninde baıandaldy. 2024 jyldyń basynan beri bankterdiń aktıvteri 19,7 paıyzǵa, ıaǵnı 61,6 trıllıon teńgege deıin ósti. Ekonomıkany kredıtteý 20,9 paıyzǵa nemese 33,8 trıllıon teńgege deıin ulǵaıdy. Bankterdiń jumys istemeıtin aktıvteri – 3,1 paıyzdan tómen deńgeıde.
Agenttik 21 bankke jyl saıynǵy qadaǵalaý-baǵalaý jumystaryn aıaqtady. Sondaı-aq 11 banktiń aktıvi sapalyq turǵydan baǵalanyp, stress-testileý júrgizildi. Atalǵan shara bank júıesi aktıvteriniń 85 paıyzyn qamtydy. Buǵan qosa, 400 mıllıard teńge kóleminde memlekettiń qoldaý qarajaty merziminen buryn qaıtaryldy.
Mádına Ábilqasymova strestik aktıvter naryǵyn damytýdy kózdeıtin zańnamalyq túzetýler qabyldanyp, osy tektes aktıvterdi satýǵa arnalǵan alǵashqy tsıfrlyq platforma iske qosylǵanyn aıtty.
Básekelestikti kúsheıtý úshin bank sektoryna Ońtústik Koreıadan, Qatar Memleketinen jáne Birikken Arab Ámirlikterinen sheteldik bankter tartyldy.
Memleket basshysyna naqty sektor men bıznes sýbektilerin nesıeleý týraly málimet berildi. 2024 jyly bızneske berilgen kredıtter 16,3 paıyzǵa nemese 13,1 trıllıon teńgege deıin ulǵaıǵan. Bul rette bızneske 18,2 trıllıon teńge somasyna jańa zaımdar berilgen.
Qasym-Jomart Toqaevtyń halyqtyń shamadan tys kredıt alýyn tómendetý jóninde bergen tapsyrmasyna sáıkes, 2024 jylǵy maýsymda kredıt berý kezinde táýekelderdi barynsha azaıtý jáne qaryz alýshylardyń quqyqtaryn qorǵaý baǵytynda zań qabyldandy. Sonymen qatar 614 myń azamattyń 210 mıllıard teńge somasyndaǵy problemalyq bereshegi qaıta qurylymdaldy, ishinara nemese tolyq keshirildi.
Agenttik tóraǵasy azamattardy qarjylyq alaıaqtyqtan qorǵaý maqsatynda zańnamalyq túzetýlerdiń jańa toptamasy ázirlengenin jetkizdi.
Budan bólek, Memleket basshysyna saqtandyrý naryǵyn tsıfrlandyrý nátıjesi tanystyryldy. Azamattardyń turǵyn úılerin apat táýekelderinen mindetti saqtandyrý modeli ázirlendi. Kredıttik reıtıng agenttikteri týraly, Investıtsııalyq jáne venchýrlyq qorlar týraly zań jobalary daıyndaldy.
Kezdesý sońynda Qasym-Jomart Toqaev Agenttikke qarjylyq turaqtylyqty qamtamasyz etý, naqty sektordy kredıtteý aıasyn odan ári keńeıtý, qarjylyq qyzmetterde tutynýshylardyń quqyqtaryn qorǵaý tetikterin kúsheıtý jóninde birqatar mindet júktedi.