Memleket basshysy Kárim Másimovke raqymshylyq jasaýdan bas tartty

ASTANA. KAZINFORM – Prezıdent Qasym-Jomart Toqaev QR Ulttyq qaýipsizdik komıtetiniń burynǵy tóraǵasy Kárim Másimovke raqymshylyq jasaýdan bas tartty. Bul týraly Kazinform tilshisine QR Prezıdenti janyndaǵy Raqymshylyq máseleleri jónindegi komıssııanyń tóraǵasy, Májilis depýtaty Marat Báshimov aıtyp berdi.

Depýtat Konstıtýtsııaǵa sáıkes Qazaqstanda raqymshylyq jasaý quqyǵy prezıdentke tıesili ekenin eske saldy.

«QR Prezıdenti janyndaǵy Raqymshylyq jasaý jónindegi komıssııa Memleket Basshysy Qasym-Jomart Toqaevqa Kárim Másimovke raqymshylyq berýden bas tartýdy usyndy, munymen Qazaqstan Prezıdenti kelisti», - dedi Marat Bashımov.

Eske sala keteıik, 2022 jyldyń qańtarynda K. Másimovke qatysty satqyndyq faktisi boıynsha sotqa deıingi tergeý bastaldy.

Ol 6 qańtarda QR Ulttyq qaýipsizdik komıtetiniń tóraǵasy qyzmetinen bosatylyp, 8 qańtarda qamaýǵa alynyp, tergeý ızolıatoryna ornalastyryldy.

2022 jyly tamyz aıynyń sońynda is sotqa berildi. Al 2023 jyldyń sáýirinde UQK burynǵy basshysynyń burynǵy orynbasarlary satqyndyq, bılikti kúshpen basyp alý áreketi, bılik pen laýazymdyq ókilettigin asyra paıdalanǵany úshin kináli dep tanyldy. 

Másimovtiń isi «asa qupııa» belgisimen ótti. 

Kárim Másimov 18 jylǵa bas bostandyǵynan aıyrylyp, múlki tárkilenip, ómir boıy memlekettik qyzmette jumys isteý quqyǵynan aıyryldy.

Bul úkimge shaǵym túsirildi. 2023 jyldyń maýsymynda elordalyq sot úkimniń tutqyndy ustaý bóligin ǵana jeńildetti.

2023 jyly qarasha aıynda Ulttyq qaýipsizdik komıteti Kazinform agenttigine K.Másimovke qatysty QR QK 218 jáne 366 baptarynda kózdelgen qylmys belgileri boıynsha sotqa deıingi tergeý jalǵasyp jatqanyn habarlady. 

Al K. Másimov qylmystyq is sheńberinde birqatar tergeý júrgizý úshin Astana qalasy UQK tergeý ızolıatoryna qaldyryldy.