12:36, 13 Jeltoqsan 2024 | GMT +5
Memleket basshysy Qaratal aýdanyndaǵy áleýmettik nysandarmen tanysty
TALDYQORǴAN. KAZINFORM — Prezıdent Qasym-Jomart Toqaevtyń Jetisý oblysyna sapary Qaratal aýdanynda jalǵasty.
Memleket basshysy Eskeldi bı aýylynda bıyl paıdalanýǵa berilgen mádenıet úıi men sport kesheniniń ǵımarattaryn aralap kórdi.
Jergilikti bıýdjet esebinen boı kótergen 150 oryndyq mádenıet úıinde kitaphana, ájeler men dombyrashylar ansamblderi, bı úıirmesi sekildi ujymdar ornalasqan.
Qasym-Jomart Toqaev aýyl kitaphanasymen tanysty. Sondaı-aq ónerpaz balalarmen júzdesip, elimizdiń laıyqty azamaty bolyp ósýine tilektestik bildirdi.
Prezıdent mádenıet úıine mýzykalyq jabdyqtar men sýretshi Á.Baıandınniń kartınasyn tartý etti.
Bıyl oblystyń shalǵaı aýyldaryndaǵy bes mádenıet úıi kúrdeli jóndeýden ótip, segiz klýb jańadan salynǵan.