Prezıdent Qaraǵandy oblysynyń damý nátıjeleri men bolashaq josparlaryn tyńdady

ASTANA. KAZINFORM — Memleket basshysy Qaraǵandy oblysynyń ákimi Ermaǵanbet Bólekpaevty qabyldady, dep habarlaıdy Aqordanyń baspasóz qyzmeti.

Qasym-Jomart Toqaevqa Qaraǵandy oblysynyń áleýmettik-ekonomıkalyq jáne ınfraqurylymdyq damý barysy baıandaldy.

Ermaǵanbet Bólekpaevtyń aıtýynsha, barlyq negizgi kórsetkish boıynsha turaqty ósim baıqalady. Bıylǵy segiz aıda oblysta 3,2 trıllıon teńgeniń ónerkásip ónimderi óndirilgen. Bul ótken jyldyń sáıkes kezeńimen salystyrǵanda 7 paıyzǵa artyq. Ásirese, óńdeý ónerkásibiniń óńirlik jalpy ónimdegi úlesi artyp keledi. Metallýrgııa, mashına jasaý, aýyl sharýashylyǵy, jeńil jáne tamaq ónerkásibiniń óndiris kólemi ulǵaıdy.

Negizgi kapıtalǵa tartylǵan ınvestıtsııa kólemi 644,7 mıllıard teńgeni qurap, 11,1 paıyzǵa ósti. Bıyl jalpy quny 195 mıllıard teńge bolatyn 29 ınvestıtsııalyq joba júzege asyrylyp, 2 700-den astam jańa jumys orny paıda bolady. 2030 jylǵa deıingi josparda quny 4,5 trıllıon teńgeni quraıtyn 120 iri jobanyń pýly jasaqtaldy. Bul bastamalar 20 myń jańa jumys ornyn ashýǵa múmkindik beredi.

Qasym-Jomart Toqaevqa azyq-túlik naryǵynyń ımportqa táýeldiligin azaıtýǵa baǵyttalǵan jumystar júrgizilip jatqany jóninde aıtyldy. Aýyl sharýashylyǵynda iri jobalar iske asyrylýda. Atap aıtqanda, eki iri taýarly sút fermasynyń qurylysy aıaqtalǵan soń, óńirdiń sútke degen suranysy tolyq qamtamasyz etiledi.

Memleket basshysyna «Qarmet» AQ qyzmeti týraly aqparat berildi. Kompanııa segiz aıdyń ishinde óndiristi jańǵyrtýǵa 110 mıllıard teńge ınvestıtsııa salǵan. Nátıjesinde shoıyn óndirý — 6 paıyzǵa, bolat — 6,9 paıyzǵa, ılemdeý 5 paıyzǵa artqan. Metallýrgııa kombınatynda jańa koksty batareıalar, quıý-ılemdeý kesheni, suryptap ılemdeý tsehy sekildi aýqymdy jobalar qolǵa alynǵan. Sondaı-aq kásiporyn birtindep tabıǵı gazǵa kóshýde, alǵashqy kezeń tolyq aıaqtaldy. Shahtalardaǵy jaǵdaı da oń nátıje kórsete bastady: kómir óndirý kólemi 15 paıyzǵa artqan. Eńbek qaýipsizdigin kúsheıtýge arnalǵan is-sharalar qolǵa alynǵan.

— Kezdesý sońynda Prezıdent óńirdi áleýmettik-ekonomıkalyq turǵydan odan ári damytýǵa jáne halyqtyń ál-aýqatyn arttyrýǵa baǵyttalǵan birqatar tapsyrma berdi. Qasym-Jomart Toqaev qalalar men eldi mekenderdi jylýmen turaqty qamtý máselelerin erekshe nazarǵa alý, sondaı-aq «Qarmet» AQ kásipornyndaǵy óndiristik qaýipsizdikti qamtamasyz etý mindetterin júktedi, — delingen habarlamada.

Osyǵan deıin Memleket basshysy OPEK bas hatshysy Haıtam ál-Gaısty qabyldaǵanyn jazǵanbyz.