Memleket basshysy Qaraǵandy oblysynyń ákimi Ermaǵanbet Bólekpaevty qabyldady
Prezıdentke Qaraǵandy oblysynyń 2023 jylǵy áleýmettik-ekonomıkalyq damý qorytyndysy týraly esep berildi, dep habarlaıdy Kazinform Aqordanyń baspasóz qyzmetine silteme jasap.
Ermaǵanbet Bólekpaev baıandaǵandaı, byltyr 11 aıdyń ishinde óńirdegi ónerkásip óniminiń kólemi 3,1 trln teńge bolǵan. Negizgi kapıtalǵa salynǵan ınvestıtsııa 16,3 paıyzǵa artyp, 727 mlrd teńgege jetken. Óńdeý ónerkásibi salalarynda: mashına jasaý isinde 45%, jeńil ónerkásipte 23,9%, farmatsevtıkada 20% ósimge qol jetkizilgen.
Qaǵaz ónerkásibinde, qurylys ındýstrııasy men qara metallýrgııada ósim baıqalady. Shaǵyn jáne orta bıznes salasynda 100 myńnan astam kompanııa qyzmet etedi jáne bul baǵytta óńirdegi belsendi halyqtyń 45 paıyzy jumys isteıdi. Kásipkerler úshin bólshek salyqtyń mólsheri 4%-dan 2%-ǵa deıin tómendegen. Bıyl jalpy óńirlik ónimdegi shaǵyn jáne orta bıznestiń úlesin 19%-dan 25%-ǵa arttyrý josparlanǵan; ekonomıkanyń barlyq salasynda 25 myńnan astam jumys orny ashylyp, jumyssyzdyq deńgeıi 4,1%-ǵa, kedeılik deńgeıi 2,7%-ǵa deıin tómendegen; halyqtyń naqty tabysy 4,7%-ǵa kóbeıgen. Aýyldarda 92 densaýlyq saqtaý nysanynyń qurylysy, eki aýdanaralyq aýrýhanany jańǵyrtý jumystary bastalǵan. Bıyl «Jaıly mektep» jobasy aıasynda óńirde 7100 oryndyq 10 mektep paıdalanýǵa berilmek.
Budan bólek, Prezıdentke jylytý maýsymynyń barysy, Qarmet kásipornyndaǵy qazirgi jaǵdaı týraly baıandaldy.
Memleket basshysyna jańa ınvestordyń óndiristi turaqtandyrý jáne onyń kólemin arttyrý baǵytynda qabyldap jatqan sharalary, sondaı-aq óndiristi jańǵyrtý jáne kompanııa jumysshylarynyń eńbek qaýipsizdigin qamtamasyz etý jospary jóninde málimet berildi.
Sonymen birge E.Bólekpaev áleýmettik salanyń jaı-kúıi, «Aýyl – el besigi» jáne «Aýyl amanaty» jobalarynyń iske asyrylýy týraly da baıandady.
Qasym-Jomart Toqaev oblysty odan ári damytý jáne turǵyndardyń ál-aýqatyn jaqsartý jóninde birqatar tapsyrma berdi. Sondaı-aq Qarmet kompanııasyna qarasty nysandardaǵy jaǵdaıdy erekshe baqylaýǵa alý qajet ekenin atap ótti.
