Psıhologııalyq qoldaý, sý resýrstaryn basqarý, qarttarǵa kútim – Digital Bridge forýmynda 130-dan astam startap usynyldy
ASTANA. KAZINFORM – Digital Bridge-2025 halyqaralyq tehnologııalyq forýmynda qazaqstandyq jáne sheteldik áleýeti zor jobalar kórmesi ótip jatyr.
Startup Alley – forýmnyń mańyzdy bóligi jáne jas kompanııalar ıdeıalaryn ınvestorlarǵa, sarapshylarǵa, bıznes ókilderine jáne myńdaǵan qatysýshyǵa usyna alady.
Jobalar bilim berý, medıtsına, mobıldik sheshimder, fınteh, ekotehnologııalar men bıometrııa sekildi jasandy ıntellekt pen IT-diń túrli salalaryn qamtıdy. Sonymen birge, kórmede IT-kompanııalar bultty servıster, kıberqaýipsizdik, fınteh jáne álemdik tsıfrlyq kún tártibin aıqyndaıtyn basqa da tehnologııalar boıynsha zamanaýı sheshimderdi usyndy.
Startup Alley qatysýshylary arasynda bilim berý, medıtsına jáne jasandy ıntellektini úılestirgen jobalar bar. Máselen, WeGlobal.AI jasandy ıntellektini qoldanyp, oqýshylarǵa kásibı baǵdar berip, psıhologııalyq qoldaý alýyn qamtamasyz etedi. Osylaısha, daǵdarystyń aldyn alyp, derekterge súıenip, bilim berýdi basqarýǵa múmkindik beredi.
Al Aiutante kognıtıvti aýytqýy bar qarttarǵa kútim jasaýdy jeńildetip, týystardy, medıtsına qyzmetkerlerin jáne kútýshilerdi bir júıege toǵystyrady. CYBERPACK.AI – mektepterge arnalǵan tolyqqandy STEAM-ekojúıesin damytsa, Biometric.Vision – bıometrııalyq sáıkestendirý men klıentterdi qashyqtan tekserýge múmkindik beretin tehnologııalaryn engizip keledi. Bul kompanııalarǵa alaıaqtyq syn-qaterin azaıtýǵa múmkindik beredi.
– Biz forým aıasyndaǵy kóptegen bastamaǵa belsendi qatysyp, ár múmkindikti ónimdi ilgeriletý úshin paıdalanyp jatyrmyz. Startaptar alleıasynda áleýetti seriktestermen jáne bolashaq klıenttermen tanysyp, nátıjeli pikir almasa bastadyq. Mundaı is-sharalarǵa buryn da qatystyq, bul jobanyń damýyna septigin tıgizip, jańa múmkindikterge jol ashady», – dedi CYBERPACK.AI kompanııasynyń qarjy dırektory Mansur Ahmerov.
Kórmede medıtsına men turaqty damý baǵytyndaǵy sheshimder de usynylǵan. Bul rette NeuroGuard neırodegeneratıvti aýrýlardy erte anyqtaýǵa múmkindik beredi, al Ascle dárigerlerdiń ýaqytyn únemdep, aıtylǵan mátindi medıtsınalyq kartaǵa jáne aldyn ala dıagnozǵa aınaldyrady.
Bas Taxi – taksı men kýrerlik servısterdi biriktiretin ulttyq mobıldik platformany damytsa, Aquaguard – gıperspektraldy túsirilimder arqyly sý resýrstaryn paıdalanýdy baqylaıdy. Al Agrotehnologııalyq hab – «muzdyqtan egistikke deıingi» sý qozǵalysyn qadaǵalaıdy.
Qarjylyq jáne bıznes-baǵyttaǵy sheshimderdiń ishinde alaqan tamyrlarynyń bıometrııasy arqyly tólem jasaıtyn Alaqan tehnologııasy jáne protsesterdi avtomattandyrýǵa arnalǵan ıntellektýaldy ónimder ázirleıtin Shai.pro AI zerthanasy bar.
Eske sala ketsek, 2–4 qazan kúnderi Astanada tehnologııalar men jasandy ıntellekt salasynda Digital Bridge halyqaralyq forýmy ótip jatyr. Bıyl aıtýly oqıǵa 30-dan astam elden kelgen 30 myńnan astam qatysýshy, júzden astam ınvestor men 400-den astam spıkerdiń basyn qosty. Barlyq shyǵyn demeýshilik qarajat esebinen jabylǵan.
EKSPO kórmesine salynǵan «Nur álem» pavılonynyń ornynda ALEM.AI alǵashqy JI ortalyǵy ashyldy. Onda Telegram, Presight, ıAndeks kompanııalarynyń JI boıynsha zerthanalary men ókildikteri ashylmaq.
Sonymen birge, Qazaqstanda JI-terapevt pen feldsherdi qorǵaıtyn vıdeojeton jasaldy.