Memleket basshysy Izraıldiń syrtqy ister mınıstrin qabyldady

ASTANA. KAZINFORM – Memleket basshysy Qasym-Jomart Toqaev Izraıldiń syrtqy ister mınıstri Gıdeon Saardy qabyldady, dep abarlady Aqorda.

Qasym-Jomart Toqaevtyń aıtýynsha, Gıdeon Saardyń sapary Izraıldiń Qazaqstanmen kópjaqty yntymaqtastyqty nyǵaıtýǵa beıil ekenin rastaıdy.

Kezdesýde saýda-ekonomıkalyq jáne ǵylymı-tehnıkalyq yqpaldastyqty jandandyrýǵa, jasandy ıntellekt, aýyl sharýashylyǵy, sý resýrstaryn basqarý, sondaı-aq basqa salalardaǵy birlesken jobalardy júzege asyrýǵa basa mán berildi.

Prezıdent Gıdeon Saardyń Astanaǵa sapary aıasynda Qazaqstan-Izraıl bıznes forýmyn ótkizýdi qoldap, onyń qorytyndysy eki eldiń ınvestıtsııalyq seriktestigin keńeıtýge eleýli úles qosatynyna senim bildirdi.

Syrtqy ister mınıstri Izraıldiń Qazaqstanmen memleketaralyq qarym-qatynastardy damytýǵa jáne ózara baılanystardy jańa ári sapaly deńgeıge kóterýge múddeli ekenin jetkizdi.

Gıdeon Saar Qazaqstannyń Ibrahım kelisimderine qosylýyn Prezıdent Qasym-Jomart Toqaevtyń kóregen sheshimi retinde baǵalady. Bul turaqtylyqty, beıbitshilikti jáne halyqaralyq dıalogty odan ári nyǵaıtýǵa yqpal etetinin atap ótti.

Izraıl syrtqy ister mınıstrliginiń basshysy Qazaqstanda júrgizilip jatqan aýqymdy saıası jáne áleýmettik-ekonomıkalyq reformalarǵa joǵary baǵa berip, atalǵan bastamalardy tabysty júzege asyrýǵa tilektestik bildirdi.

Kezdesý barysynda halyqaralyq kún tártibiniń ózekti máseleleri talqylandy.

Aıta keteıik, búgin Memleket basshysy Izraıl Prezıdenti Itshak Gertsogqa Halyqaralyq Holokost qurbandaryn eske alý kúnine oraı jedelhat joldady.