Memleket basshysy Izraıl Prezıdenti Itshak Gertsogpen kezdesý ótkizdi
ASTANA. KAZINFORM — Bakýde ótip jatqan Azııadaǵy ózara is-qımyl jáne senim sharalary keńesiniń 7-sammıti aıasynda Prezıdent Qasym-Jomart Toqaev Izraıl Prezıdenti Itshak Gertsogpen kezdesti. Bul týraly Aqordanyń baspasóz qyzmeti habarlady.
Memleketter basshylary Qazaqstan-Izraıl qarym-qatynasy qarqyndy sıpat alǵanyna toqtaldy. Sondaı-aq saýda-ekonomıkalyq jáne ınvestıtsııalyq yqpaldastyqqa den qoıa otyryp, mańyzdy baǵyttar boıynsha yntymaqtastyqty damytý perspektıvasyn talqylady.
Qasym-Jomart Toqaev Itshak Gertsogtiń sáýir aıynda Astanaǵa jasaǵan sapary memleketter arasyndaǵy baılanysty nyǵaıtýǵa aıtarlyqtaı serpin bergenine nazar aýdardy.
Izraıl Prezıdenti de Qazaqstanǵa saparyn rızashylyqpen eske aldy. Onyń pikirinshe, elimizdiń kóptegen salada alǵa basýy ekijaqty yqpaldastyqty ilgeriletýge jol ashady.
Itshak Gertsog Qazaqstannyń Beıbitshilik keńesine qosylýyn quptap, bul oqıǵanyń beıbitshilik pen turaqtylyqty nyǵaıtýǵa qosylǵan zor úles ekenin atap ótti.
Sondaı-aq taraptar halyqaralyq kún tártibindegi ózekti máseleler, sonyń ishinde Taıaý Shyǵystaǵy ahýal jóninde pikir almasty.
Memleket basshysy shıelenisti báseńdetip, qaqtyǵystardy dıplomatııa quraldary arqyly retteý qajettigin jetkizdi jáne Qazaqstannyń osy qaǵıdatty berik ustanatynyn aıtty.
Aıta ketelik Prezıdent AÓSShK 7-sammıtine qatysý úshin Baký qalasyna barǵan edi.
