Memleket basshysy Islam damý bankiniń prezıdentimen kezdesti
ASTANA. KAZINFORM - Memleket basshysy Islam damý bankiniń prezıdenti Muhammed Sýleıman ál-Djasserdi qabyldady, dep habarlaıdy Aqorda.
Kezdesýde buǵan deıin qol jetkizilgen kelisimderdi iske asyrý jáne yntymaqtastyq perspektıvasyna qatysty máseleler talqylandy. Qorshaǵan ortany qorǵaý salasyna, sonyń ishinde klımattyq ózgeris saldaryn jeńildetý jáne «jasyl» energetıkaǵa kóshý sharalary boıynsha birlesken jobalarǵa basa nazar aýdaryldy. Qasym-Jomart Toqaev jahandyq ekologııalyq syn-qaterler men Qazaqstannyń ornyqty damýǵa umtylysy jaǵdaıynda bul bastamalardyń mańyzy zor ekenin atap ótti.
Qazaqstan Prezıdenti bıyl qyrkúıek aıynda Astanada ótken Arab úılestirý tobynyń dóńgelek ústel formatyndaǵy basqosýynyń qorytyndysyna joǵary baǵa berdi. Bul is-shara taraptardyń strategııalyq jobalardy júzege asyrýdaǵy kópjaqty yntymaqtastyqty tereńdetýge ózara beıildi ekenin kórsetti.
Memleket basshysy «Klımat ózgerisine tózimdi sý resýrstaryn damytý» jobasy boıynsha qarjylyq jáne tehnıkalyq kelisimniń birinshi fazasyna qol qoıylǵanyn aıtty. Atalǵan jobany iske asyrý Qazaqstannyń 7 oblysynda 8 sý qoımasy men jalpy uzyndyǵy 3450 shaqyrym bolatyn 115 kanaldy, 1 qarsy rettegishti salýǵa jáne jóndeýge múmkindik beredi. Bul elimizdiń agrarlyq salasynda 332 myń gektardan astam alqapty sýmen úzdiksiz qamtamasyz etedi.
Kezdesý sońynda Qasym-Jomart Toqaev Qazaqstannyń ornyqty ekonomıkalyq damýyna udaıy qoldaý kórsetip kele jatqany úshin Islam damý bankiniń basshylyǵyna rızashylyǵyn bildirdi.
Kelissózder qorytyndysy boıynsha qol qoıylǵan qujattardy almasý rásimi ótti. Kelisim somasy 1,153 mıllıard dollardy quraıdy, sondaı-aq 3,5 mıllıon dollar kóleminde grant beriledi. Bul – banktiń 51 jyldyq tarıhyndaǵy eń kólemdi qarjylandyrý jobasy.
Eske salaıyq, búgin Prezıdent Qasym-Jomart Toqaev Dúnıejúzilik klımat sammıtine qatysý úshin Bakýdegi olımpıadalyq stadıonǵa bardy. Sosyn Memleket basshysy Bakýdegi Dúnıejúzilik klımat sammıtinde sóz sóıledi. Klımattyń ózgerýi jónindegi BUU-nyń negizdemelik konventsııasyna qosylýshy taraptardyń 29-shy konferentsııasy aıasynda QR Prezıdenti Qasym-Jomart Toqaev Fınlıandııa Prezıdenti Aleksandr Stýbbpen kezdesý ótkizdi. Sondaı-aq Qasym-Jomart Toqaev SOP29 cammıtinde birqatar eldiń basshylarymen áńgimelesti.
