Memleket basshysy Iordanııa Korolin Al-Farabi ordenimen marapattady
ASTANA. KAZINFORM — Prezıdent Qasym-Jomart Toqaev Iordanııa Koroli II Abdallanyń elimizge saparyn eki eldiń strategııalyq seriktestigi tereńdeı túskeniniń aıqyn kórinisi dep atady.
Prezıdenttiń paıymdaýynsha, joǵary deńgeıdegi qarqyndy yqpaldastyq ortaq basymdyqtardy jáne ekijaqty yntymaqtastyqtyń kún tártibin ilgeriletýge qolaıly jaǵdaı týǵyzady.
— Biz Iordanııamen san qyrly baılanystardy joǵary baǵalaımyz. Elimiz Sizdi búkil álemde bedeli bıik kórnekti ári kóregen kóshbasshy retinde biledi. Sizdiń tegeýrindi, baıypty basshylyǵyńyzben Iordanııa beıbitshilik pen turaqtylyqtyń, abyroı men ádilettiń mekeni, sondaı-aq qarqyndy damý ústindegi ınnovatsııa men ornyqty ósim ortalyǵy retinde tanyldy. Álemdik qoǵamdastyq Sizdiń oı-pikirińizge qulaq asady, jahandyq dıalogty órbitýge eleýli túrde yqpal etip kelesiz. «Aqaba protsesi» bastamasy Sizdiń halyqaralyq qaýipsizdikti kúsheıtýge árdaıym beıil ekenińizdi anyq kórsetedi. Erteń Astanada Iordanııamen birlesip osy bastama aıasyndaǵy kezekti sammıtti ótkizemiz. Bul — biz úshin úlken mártebe, — dedi Memleket basshysy.
Qasym-Jomart Toqaev Koroldiń dáıekti qoldaýynyń arqasynda ekijaqty yntymaqtastyq qazirdiń ózinde aıtarlyqtaı nátıjelerge ulasqanyna nazar aýdardy.
— Búginde seriktestigimiz eki memlekettiń de zor áleýetin asha otyryp, jańa, perspektıvti baǵyttarda belsendi túrde damyp keledi. Byltyr uıymdastyrylǵan ózara saparlar buǵan tyń serpin berdi. Osy oń qarqyndy saqtap, yqpaldastyqty budan da joǵary deńgeıge jetkizýge nıettimin, — dedi Prezıdent.
Memleket basshysy Korol II Abdallany Qazaqstannyń jaqyn dosy sanaıtynyn aıtty.
— Qazaqstan men Iordanııanyń arasyndaǵy dostyq baılanystardy nyǵaıtýǵa qosqan eleýli úlesińiz úshin Sizge Al-Farabi ordenin tabystaý — men úshin zor mártebe. Bul joǵary nagradanyń ataýy Shyǵystyń uly oıshylynyń qurmetine qoıyldy. Ál-Farabıdiń murasy qanshama býyndy qanattandyryp, adamgershilik shamshyraǵy bolyp keledi. Ol saıası oı-sananyń, ǵylym men ádebıettiń qalyptasýynda baǵa jetpes tarıhı ról atqardy. Ál-Farabı kúlli arab áleminiń júregine jol tapqan aqyldyń keni ispettes. Onyń eshqashan ózektiligin joımaıtyn danalyq, úılesim jáne birlik týraly ulaǵatty oılary — mádenıetterimizdiń ortaq qazynasy. Biz Sizdiń osynaý izgi qundylyqtardy dáripteýge qosqan úlesińizdi joǵary baǵalaımyz. Atalǵan mártebeli marapattyń alǵashqy ıegeri bolyp otyrsyz. Muny tarıhı ýaqıǵa dep sanaımyz. Osy joǵary nagradany Qazaqstannyń Sizge degen rııasyz qurmetiniń belgisi retinde qabyl alyńyz, — dedi Qasym-Jomart Toqaev.
Buǵan deıin Prezıdent Qasym-Jomart Toqaev Aqaba protsesin joǵary baǵalaıtynyn jáne aldaǵy sessııanyń jasandy ıntellekt salasyndaǵy qaýipsizdik taqyrybyna arnalatynyn habarlaǵan edi.
Búgin Prezıdent Qasym-Jomart Toqaevtyń shaqyrýymen Qazaqstanǵa Iordan Hashımıt Koroldiginiń Koroli II Abdalla ben ál-Hýseın resmı saparmen keldi. Astana áýejaıynda Iordanııa Korolin Memleket basshysynyń ózi kútip aldy.
Sondaı-aq Aqordada Qazaqstan Prezıdenti Qasym-Jomart Toqaev pen Iordanııa Koroli ІІ Abdalla ben ál-Hýseın kelissóz júrgizdi.
