Memleket basshysy ınvestıtsııalyq jobalardy súıemeldeıtin ShYU Keńsesin qurýdy usyndy

ASTANA. KAZINFORM — Qasym-Jomart Toqaev Astana halyqaralyq qarjy ortalyǵy bazasynda perspektıvti ınvestıtsııalyq jobalardy súıemeldeıtin ShYU Keńsesin qurýdy usyndy, dep habarlaıdy Aqordanyń baspasóz qyzmeti.

Memleket basshysy saýda-ekonomıkalyq jáne ınvestıtsııalyq yntymaqtastyqty arttyrý óte ózekti dep sanaıdy. Bul rette Qazaqstan ShYU-nyń sanktsııalyq qysymǵa qarsy erkin ári ádil álemdik saýdany damytý baǵytyndaǵy naqty is-qımylyn qoldaıdy.

— ShYU qurylǵan sátten beri elderimizdiń álemdik ishki jalpy ónimdegi úlesi eki ese ulǵaıyp, 30 paıyzǵa jetti. Іshki óńirlik saýda senimdi túrde ósip keledi. Byltyrǵy qorytyndy boıynsha onyń kólemi 650 mıllıard dollardan asty. Qazaqstannyń ShYU elderimen taýar aınalymy da turaqty túrde ósip, ótken jyly 70 mıllıard dollarǵa jýyqtady. Qazaqstan ShYU damý bankin qurý jónindegi Qytaıdyń bastamasyna qoldaý bildirip, atalǵan perspektıvti jobaǵa atsalysýǵa ázir. Budan bólek, Astana halyqaralyq qarjy ortalyǵy bazasynda perspektıvti ınvestıtsııalyq jobalardy súıemeldep, zańgerlik, konsaltıngtik jáne qarjylyq kompanııalardy shoǵyrlandyratyn ShYU Keńsesin qurýdy usynamyn, — dedi Qasym-Jomart Toqaev.

Osyǵan deıin Prezıdent Qazaqstan «úsh zulymdyqqa», ıaǵnı, terrorızmge, separatızmge jáne dinı ekstremızmge qarsy kúreste kúsh-jiger biriktirýdi óte ózekti sanaıtynyn aıtty.

Sonymen qatar Qazaqstan ShYU-nyń qaýipsizdik syn-qaterlerimen kúres jóninde tórt ortalyq qurý bastamasyn qoldaıdy.