Memleket basshysy Indorama basqarma tóraǵasynyń orynbasary Amıt Lohıany qabyldady
SINGAPÝR. KAZINFORM – Prezıdent Qasym-Jomart Toqaev Qazaqstan-Sıngapýr bıznes forýmy aıasynda munaı hımııasy ónimderin shyǵaratyn iri kásiporyn – Indorama korporatsııasy basshylarynyń biri Amıt Lohıamen kezdesti.
Sıngapýrda ornalasqan Azııadaǵy jetekshi hımııa ónerkásibi holdınginiń 32 elde 136-dan astam óndiris alańy bar. Sondaı-aq álemdegi eń iri kompanııalardyń – Forbes Global 2 000 tizimine kiredi.
Prezıdentke berilgen málimet boıynsha atalǵan kompanııa Jambyl oblysyndaǵy fosfor ken orny bazasynda tolyq tsıkldi fosfor tyńaıtqyshy óndirisin ashý jónindegi ınvestıtsııalyq jobany júzege asyrýǵa qyzyǵýshylyq tanytyp otyr.
Byltyr maýsym aıynda Indorama korporatsııasy elimizde hımııa ónerkásibin damytý maqsatynda AHQO ıýrısdıktsııasynda jańa ken oryndaryn ıgeretin Indorama Kazakhstan Mining enshiles uıymyn tirkedi.
Memleket basshysy agroónerkásip sektorynda mıneraldy tyńaıtqyshtardy qoldaný mańyzdy ekenin atap ótip, Indorama korporatsııasyn elimizdiń aýmaǵynda hımııa óndirisin ashý úshin ınvestıtsııa salý perspektıvasyn jan-jaqty zerdeleýge shaqyrdy.
