Memleket basshysy HHHІІІ jazǵy Olımpıada oıyndarynyń júldegerlerimen kezdesti
ASTANA. KAZINFORM – Prezıdent Qasym-Jomart Toqaev saltanatty jıynǵa qatysýshy sportshylar men bapkerlerdi Parıj Olımpıadasyndaǵy jetistikterimen quttyqtap, árbir jeńis zor erik-jiger men qajyrly eńbektiń jemisi ekenine nazar aýdardy, dep habarlaıdy Aqordanyń baspasóz qyzmeti.
Memleket basshysy, eń aldymen, Olımpıada chempıony Eldos Smetovtiń jeńisine erekshe toqtaldy.
– Ol baıraqty básekeniń alǵashqy kúnderi Jaqsylyq Úshkempirovtiń dańqty jolyn jalǵady. El tarıhynda tuńǵysh ret dzıýdodan Olımpıadanyń altyn medalin aldy. Eldos baýyrym, sen Olımpıadaǵa attanar aldynda maǵan jáne barlyq sport jankúıerlerine bar kúsh-jigerimdi jeńiske jetý úshin jumsaımyn dep ýáde berdiń. Sózińde turdyń. Naǵyz jigitsiń! Biz bárimiz seni maqtan tutamyz. Shyn máninde, qatarynan úsh ret Olımpıada júldegeri ataný – naǵyz chempıonnyń qolynan keletin erlik. Seniń jeńisti jolyń sportshylarymyzǵa jiger berdi, barsha halqymyzdy qýanyshqa bóledi, – dedi Prezıdent.
Qasym-Jomart Toqaev tórtjyldyqtyń dodasynan júldemen oralǵan ózge sportshylarǵa, bapkerler men atletterdi daıyndaýǵa úles qosqan azamattarǵa alǵys aıtty.
– Narıman Qurbanovtyń kúmis júldesin tarıhı jetistik deýge bolady. Gımnastıka sheberleri tuńǵysh ret Olımpıada bıigin baǵyndyryp otyr. Demeý Jadyraev pen Nurbek Oralbaı tamasha óner kórsetti. Mergenderimiz Aleksandra Le men Islam Sátbaev nysana kózdeýden qola medal aldy. Bul – 28 jyldan beri elimizdiń osy sport túrinen alǵan alǵashqy júldesi. Balýan Ǵusman Qyrǵyzbaev pen boksshy Nazym Qyzaıbaı júldegerler qataryna qosyldy. Jalpy barlyq memleket Olımpıadaǵa eń myqty sportshylaryn jiberedi. Shyn máninde, júzden júırik, myńnan tulpar shyǵyp, álemdik básekede jeńiske jetý ońaı emes. Mundaı jahandyq dodada el qorjynyna túsken ár medaldiń orny aıryqsha. Sondyqtan búgin men Olımpıada júldesine ıe bolǵan barsha sportshylarymyzǵa shynaıy rızashylyǵymdy bildiremin. Jeńis jolynda sportshy ǵana emes, sol salanyń kóptegen mamandary da ter tógedi. Men bapkerlerge, sportshylardy daıyndaýǵa úles qosqan basqa da kásip ıelerine alǵys aıtamyn. Ulttyq Olımpıada komıtetiniń basshylary jumysqa jańa serpin berip, halyqaralyq yntymaqtastyqty damytý úshin mańyzdy qadam jasady. Jaýapty sátterde sportshylarymyzdyń qasynda bolyp, qoldaý kórsetti. Ulttyq Olımpıada komıteti bastaǵan isti jalǵastyryp, aldaǵy ýaqytta naqty nátıjege jetedi dep oılaımyn, – dedi Memleket basshysy.
Prezıdenttiń aıtýynsha, Parıjdegi báseke olımpıadalyq sport túrlerin odan ári qoldaý mańyzdy ekenin kórsetti. Óıtkeni keıbir sportshylarymyz jeńis tuǵyryna qolsozym jerden toqtady, úzdik ondyqtan kórindi. Bul olardyń sheberligin ári jeńiske degen erik-jigerin baıqatady. Áıtse de, Memleket basshysynyń pikirinshe, kásibı sportta sheshimin kútken túıtkildi máseleler de barshylyq.
– Memleket eń joǵary deńgeıdegi sportshylardy daıyndaýǵa jetkilikti mólsherde qarjy bóledi. Sondyqtan jurtshylyqtyń halyqaralyq jarystarda keıbir sport túrlerinen júlde kútýi – zańdylyq. Salalyq vedomstvo sporttyń olımpıadalyq túrlerin damytý isinde ketken júıeli qatelikterdi egjeı-tegjeıli taldaýǵa tıis. Keshendi reforma jasaıtyn ýaqyt keldi. Al ony júzege asyrý úshin quzyretti mınıstrlik, Ulttyq olımpıada komıteti jáne sport federatsııalary úılesimdi áreket etýi kerek. Sportta ádil básekelestik rýhy saltanat qurýy qajet. Jemqorlyqpen tabandy túrde kúresip, joǵary nátıjege qol jetkizýge kedergi keltiretin protektsıonızm sekildi faktorlardan irgeni aýlaq salǵan jón, – dedi Qasym-Jomart Toqaev.
Memleket basshysy buqaralyq, sondaı-aq balalar men jasóspirimder sportyna basa mán berý qajet ekenin aıtty.
– Bul – óte mańyzdy mindet. Sebebi buqaralyq sportty damytý arqyly biz kásibı sportqa jol ashamyz jáne eń bastysy, ult saýlyǵyn jaqsartamyz. Sondyqtan memleket sport ınfraqurylymyn damytý úshin tıisti qarajat bólýde, ıaǵnı balalardyń jastaıynan alańsyz sportpen shuǵyldanýyna qajetti jaǵdaıdy jasap jatyr. Elimizdiń aımaqtarynda 20 myńnan astam sport alańdary jumys istep tur, 16 myńnan asa arnaıy keshender men zaldar bar. Osy nysandardyń barlyǵy tolyqqandy qyzmet etýge tıis jáne sportpen aınalysamyn degen árbir adamǵa qoljetimdi bolýy kerek. Barlyq oblys ortalyǵynda jáne aýdandarda fýtbol, boks, kúres, basketbol, voleıbol, sadaq atý, ústel tennısi, shahmat jáne taǵy da basqa tanymal sport túrleriniń sektsııasy bolýǵa tıis. Bul – ákimderdiń mindeti. Al Úkimet sport nysandarynyń jumys tıimdiligine saraptama júrgizip, osy másele boıynsha tıisti sharalar qabyldaǵany durys, – dedi Prezıdent.
