Prezıdent halyqaralyq pán olımpıadalary jeńimpazdarymen jáne júldegerlerimen kezdesti
ASTANA. KAZINFORM – Prezıdent Qasym-Jomart Toqaev Aqordada halyqaralyq pán olımpıadalarynda jeńimpaz atanyp, júldeli oryndarǵa ıe bolǵan oqýshylarmen jáne stýdenttermen kezdesti. Bul týraly Aqorda habarlady.
Saltanatty is-sharaǵa 21 laýreat, sondaı-aq olardyń ustazdary men tálimgerleri shaqyryldy. Fızıka, hımııa, bıologııa, matematıka, ınformatıka, geografııa jáne lıngvıstıka pánderinen bedeldi bilim saıysynda top jarǵan jeńimpazdardyń altaýy – altyn medal, on biri – kúmis, tórteýi – qola medal ıegerleri.
Prezıdent bilim saıysynda úzdik nátıjege qol jetkizgen daryndy jastardy jarqyn jeńisimen quttyqtap, olarǵa shynaıy rızashylyǵyn bildirdi.
– Árqaısyńyz álemniń eń zııatker oqýshylarymen básekege túsip, bedeldi bilim dodalarynda top jardyńyzdar. Kók Týymyzdy bıikke kóterip, elimizdiń abyroı-bedelin arttyrýǵa mol úles qosyp júrsizder. Biz sizderdi maqtan tutamyz. Qazaqstannyń jarqyn bolashaǵy – oıy ushqyr, bilimdi, daryndy jastardyń qolynda. Men Memleket basshysy retinde bárińizge zor rızashylyǵymdy bildiremin. Sizder el maqtanyshy degen atqa laıyqsyzdar! – dedi Memleket basshysy.
Qasym-Jomart Toqaev tabandy eńbek, úzdiksiz izdenýmen jeńip alǵan ár medaldiń baǵasy qymbat, mańyzy zor ekenin atap ótti.
– Saǵattap oqý, aılar boıy daıyndyq júrgizý, jyldar boıy bıik maqsatqa umtylý úshin, eń aldymen, qajyrly qaırat pen myqty kúsh-jiger kerek. Uly Abaı da «Úsh-aq nárse adamnyń qasıeti: ystyq qaırat, nurly aqyl, jyly júrek» dep ósıet aıtty. Sizder árqaısyńyz kóp uzamaı bilikti ınjener, kórnekti ǵalym, myqty maman bolasyzdar. Jańa tehnologııalardy oılap taýyp, elimizdiń órkendeýine, álemniń damýyna yqpal etetin jańalyq ashasyzdar. Men buǵan kámil senemin, – dedi Prezıdent.
Qazaqstan oqýshylary ótken oqý jylynda halyqaralyq olımpıadalarda 1 059 medal jeńip alǵanyn jazǵan edik.
