Memleket basshysy Halyq qaharmany Sát Toqpaqbaevqa Altyn juldyz ben «Otan» ordenderin tabystady
ASTANA. KAZINFORM – Memleket basshysy Qasym-Jomart Toqaev Halyq qaharmany Sát Toqpaqbaevqa aıryqsha erekshelik belgisi – Altyn juldyz ben «Otan» ordenderin saltanatty túrde tabystady, dep habarlaıdy Aqordanyń baspasóz qyzmeti.
«Aqorda» rezıdentsııasynda kórnekti memleket jáne qoǵam qaıratkeri, general-polkovnık, ulttyq qaýipsizdik jáne qorǵanys salalarynyń ardageri Sát Besimbaıuly Toqpaqbaevty «Halyq qaharmany» ataǵymen, sondaı-aq aıryqsha erekshelik belgisi – Altyn juldyz ben «Otan» ordenderimen marapattaý rásimi ótti.
Jıynda Prezıdent Qasym-Jomart Toqaev arnaıy sóz sóılep, Sát Toqpaqbaevty qalyń jurtshylyq qurmetteıtinin, onyń eńbek joly el ómirimen tyǵyz baılanysty bolǵanyn aıtty.
– Siz qasterli Otanymyzǵa adal qyzmet ettińiz. Endi ǵana táýelsizdik alyp, derbes memleket bolǵan jyldary asa jaýapty mindetterdi atqarýǵa bilek sybana kirisip kettińiz. Elimizdiń tynyshtyǵy men tutastyǵyn saqtaý úshin orasan zor úles qostyńyz. Shyn máninde, muny naǵyz erlik dep baǵalaýǵa bolady. Qazir de qoǵamǵa paıdaly isterdi atqaryp júrgenińizdi biz jaqsy bilemiz. Elimizdiń laıyqty azamatysyz, – dedi Memleket basshysy.
Sát Toqpaqbaev memleketimizdiń qaýipsizdigi jáne elimizdiń tynyshtyǵy jolyndaǵy eńbegin baǵalaǵany úshin Qasym-Jomart Toqaevqa alǵys aıtty.
– Ádiletti Qazaqstan qurý isindegi zor eńbegińizdi jáne súıikti Otanymyzdy halyqqa jaıly elge aınaldyrý maqsatynda júzege asyryp jatqan saıasatyńyzdy tolyǵymen qoldaımyn. Táýelsizdigimizdiń baıandy bolýy jolynda Sizben árdaıym birgemin! Elimizdiń ishi daýdan, syrty jaýdan aman bolsyn! Otanymyzda tynyshtyq, birlik, aýyzbirshilik árdaıym saltanat qursyn, – dedi Sát Toqpaqbaev.
Saltanatty jıynǵa Memlekettik keńesshi Erlan Qarın, Prezıdent Ákimshiliginiń Basshysy Aıbek Dádebaı, Ulttyq qaýipsizdik komıtetiniń tóraǵasy Ermek Saǵymbaev qatysty.
Buǵan deıin memleket qaıratkeri Sát Toqpaqbaevqa «Halyq qaharmany» ataǵy berilgenin jazǵan bolatynbyz.
