Memleket basshysy Halyq qaharmany Ivan Gapıchtiń týǵan-týystaryna kóńil aıtý jedelhatyn joldady
ASTANA. KAZINFORM – Prezıdent Qasym-Jomart Toqaev soǵys jáne eńbek ardageri, Halyq qaharmany Ivan Gapıchtiń dúnıeden ozýyna baılanysty marqumnyń otbasyna kóńil aıtty. Bul týraly Aqordanyń baspasóz qyzmeti habarlady.
– Ivan Stepanovıch maıdanǵa óz erkimen attanyp, baılanysshy retinde soǵystyń sońyna deıin qatysty. Elge oralǵan soń uzaq jyldar boıy prokýratýra organdarynda minsiz qyzmet atqardy. Adamgershilik qaǵıdattarynan aınymaıtyn ári óz isiniń naǵyz mamany retinde ol áriptesteri men kópshilik arasynda zor abyroıǵa ıe bolyp, qurmetke bólendi. Ivan Stepanovıch ǵumyr jolynda jasampaz patrıotızmniń, antqa adaldyqtyń jáne ádildik qundylyqtaryn berik ustanýdyń joǵary úlgisin kórsetti. Onyń jarqyn beınesi jadymyzda máńgi saqtalady, – dep jazylǵan jedelhatta.
Aıta ketelik Halyq qaharmany, soǵys jáne eńbek ardageri Ivan Gapıch 104 jasqa qaraǵan shaǵynda ómirden ozǵany týraly jazǵan edik.
