Memleket basshysy Grýzııa Premer-mınıstrine І dárejeli «Dostyq» ordenin tabystady
ASTANA. KAZINFORM - Marapattaý rásiminde Qasym-Jomart Toqaev Iraklıı Kobahıdzeni elimizdiń dosy, kóregen kóshbasshy jáne óz isine berilgen memleket qaıratkeri dep atady, dep habarlaıdy Aqordanyń baspasóz qyzmeti.
– Sizdiń tegeýrindi basshylyǵyńyzdyń arqasynda Grýzııa aýqymdy áleýmettik-ekonomıkalyq reformalar júrgizip, azamattarynyń ál-aýqatyn arttyryp keledi. Sonymen qatar halyqaralyq bedelin nyǵaıtyp, aımaqtaǵy negizgi seriktesterdiń qatarynda ustanymyn kúsheıte tústi. Grýzııa qýatty ári órkendegen el retinde jańa bıikterdi baǵyndyryp, ornyqty damý jolynda alǵa qaraı qadam basa beretinine senimdimin, – dedi Prezıdent.
Budan bólek, Qasym-Jomart Toqaev tarıhı tamyrlastyq, ortaq mádenı qundylyq, san ǵasyrlyq dostyq pen ózara túsinistik baılanystyratyn Qazaqstan men Grýzııa arasyndaǵy qarym-qatynastyń qazirgi deńgeıin joǵary baǵalady.
– Qazaq halqy Grýzııanyń baı tarıhy men biregeı mádenıetine zor qurmetpen qaraıdy. Grýzın qaýymdastyǵy bizdiń kópultty qoǵamymyzdyń ajyramas bóligi sanalady ári eki el arasyndaǵy baılanysqa dáneker bolyp júr. Sońǵy jyldary ekijaqty qarym-qatynasymyz tyń serpin aldy: saıası dıalog jandanyp, ózara saýda kólemi turaqty ósip keledi. Sonymen qatar túrli saladaǵy ekonomıkalyq yntymaqtastyq keńeıe túsýde. Qazaqstan men Grýzııa álemdik arenada tıimdi yqpaldastyq ornatyp, negizgi halyqaralyq máseleler boıynsha bir birine dáıekti túrde qoldaý bildirýde, – dedi Prezıdent.
Memleket basshysy kóshbasshylyq tanytyp, eki eldiń yntymaqtastyǵyn nyǵaıtýǵa zor úles qosyp kele jatqan Iraklıı Kobahıdzege І dárejeli «Dostyq» ordenin saltanatty túrde tabystady.
Grýzııa Premer-mınıstri qyzmetine joǵary baǵa bergeni úshin Qasym-Jomart Toqaevqa alǵys aıtty.
Aıta keteıik, búgin Qasym-Jomart Toqaev Táýelsizdik saraıynda Grýzııa Premer-mınıstrin qarsy aldy.
