Memleket basshysy Grýzııa Premer-mınıstri Iraklıı Kobahıdzemen kelissóz júrgizdi
ASTANA. KAZINFORM - Prezıdent Qasym-Jomart Toqaev Grýzııa Premer-mınıstri Iraklıı Kobahıdzemen kelissóz júrgizdi. Bul týraly Aqordanyń baspasóz qyzmeti habarlady.
Memleket basshysy Iraklıı Kobahıdzege iltıpat bildirip, ony Grýzııa Premer-mınıstri laýazymyna qaıta taǵaıyndalýymen quttyqtady jáne grýzın halqynyń órkendeýi jolyndaǵy jaýapty qyzmetine sáttilik tiledi.
Prezıdent keıingi jyldary Grýzııanyń qaryshty damyp, júrgizilip jatqan reformalardyń nátıjesinde ekonomıkalyq ósimniń 9,4 paıyzdy quraǵanyn atap ótti.
Toqaev qazaq-grýzın qarym-qatynastarynyń qarqynyn joǵary baǵalady. Prezıdenttiń aıtýynsha, Grýzııa Qazaqstannyń Kavkaz aımaǵyndaǵy senimdi seriktesi jáne eki eldi ózara dostyq pen tyǵyz tarıhı tamyrlastyq baılanystyrady.
– Qazaqstan men Grýzııa túrli deńgeıde, atap aıtqanda, parlamentter, úkimettik jáne memlekettik organdar arasynda tıimdi yntymaqtastyq ornatqan, - dedi Memleket basshysy.
Grýzııa Premer-mınıstri qonaqjaılyq kórsetkeni úshin Qasym-Jomart Toqaevqa rızashylyǵyn bildirip, qyzmetke kiriskennen keıingi alǵashqy sheteldik saparlarynyń birin Qazaqstanǵa arnaǵanyn jetkizdi.
Iraklıı Kobahıdzeniń aıtýynsha, Grýzııa Qazaqstanmen kópjosparly yqpaldastyqty nyǵaıtýǵa basa mán beredi.
– Biz úshin saıası jáne ekonomıkalyq yntymaqtastyqty arttyrý asa mańyzdy. Túrli formatta, onyń ishinde kópjaqty alańdarda Qazaqstannyń múddesin belsendi qorǵaýǵa daıynbyz, - dedi ol.
Premer-mınıstr Qazaqstan Prezıdentin Grýzııaǵa saparmen kelýge shaqyrdy.
Qasym-Jomart Toqaev pen Iraklıı Kobahıdze Transkaspıı halyqaralyq kólik baǵdary boıynsha ótetin júk tasymaly kólemin arttyrýǵa jáne tranzıt dáliziniń ınfraqurylymyn jańǵyrtýǵa erekshe nazar aýdardy.
Kezdesýde saýda, energetıka, ınvestıtsııa, týrızm, jasandy ıntellekt jáne tsıfrlandyrý sekildi kóptegen baǵyttaǵy ekijaqty baılanystardy keńeıtý perspektıvasy qarastyryldy. Sondaı-aq halyqaralyq kún tártibi men óńirlik qaýipsizdiktiń ózekti máseleleri talqylandy.