Memleket basshysy Grýzııa Parlamentiniń tóraǵasy Shalva Papýashvılıdi qabyldady
ASTANA. KAZINFORM - Prezıdent Grýzııa Parlamentiniń tóraǵasy Shalva Papýashvılıdi qabyldady. Bul týraly Aqordanyń baspasóz qyzmeti habarlady.
Memleket basshysy Qasym-Jomart Toqaev meımanǵa iltıpat bildire otyryp, Qazaqstan Ońtústik Kavkaz óńirindegi negizgi seriktesteriniń biri – Grýzııamen jan-jaqty qarym-qatynasty nyǵaıtýǵa aıryqsha mán beretinin atap ótti. Sondaı-aq Prezıdent Qazaqstan men Grýzııa arasyndaǵy dostyq pen ózara túsinistik ekijaqty baılanystardy tereńdetý isinde eleýli tabysqa qol jetkizý úshin berik negiz bolatynyn aıtty.
Qasym-Jomart Toqaev parlamentaralyq dıalogtyń memleketaralyq qatynastardy nyǵaıtýda mańyzdy ról atqaratynyna toqtaldy. Bul rette «Qazaqstan-Grýzııa» parlamentaralyq dostyq toby yntymaqtastyqtyń kókjıegin keńeıtýge aıtarlyqtaı yqpal ete alatynyn atap ótti. Onyń aıtýynsha, búginde qazaqstandyq bıznes Grýzııa ekonomıkasynyń túrli sektorynda qyzmet etedi jáne eki eldiń saýda-ekonomıkalyq qatynastaryn odan ári keńeıtýge úles qosyp keledi.
Kezdesýde eki el arasyndaǵy mádenı-gýmanıtarlyq baılanystardy nyǵaıtýǵa basa nazar aýdaryldy. Qasym-Jomart Toqaev oraıly sátti paıdalana otyryp, fýtboldan ulttyq quramasy Eýropa chempıonatynyń aqtyq kezeńine shyqqan dostas Grýzııa halqyn quttyqtap, sáttilik tiledi.
Shalva Papýashvılı qurmet kórsetkeni úshin Memleket basshysy men Qazaqstan halqyna alǵys aıtty. Sondaı-aq bul Grýzııa Parlamenti tóraǵasynyń Qazaqstan Respýblıkasyna alǵashqy resmı sapary ekenin, sondyqtan onyń sapary aıtýly oqıǵa sanalatynyn atap ótti.
Shalva Papýashvılı Grýzııanyń Qazaqstanmen aradaǵy qarym-qatynasty odan ári nyǵaıtýǵa beıildi ekenin rastady. Onyń aıtýynsha, Tbılısı Astanamen jan-jaqty baılanystardy, sonyń ishinde kólik-logıstıka salasyndaǵy yqpaldastyqty tereńdetýge nıetti. Bul rette Grýzııa Parlamentiniń spıkeri Memleket basshysynyń Transkaspıı halyqaralyq kólik baǵytyn birlesip damytý týraly bastamasyn qoldady.
