Memleket basshysy Groupe ADP kompanııasynyń bas dırektory Fılıpp Paskalmen kezdesti
ASTANA. KAZINFORM -Qasym-Jomart Toqaev pen Groupe ADP kompanııasy basshysynyń kezdesýinde Almaty áýejaıyn damytýdyń uzaqmerzimdi perspektıvasyna basa nazar aýdaryldy, dep habarlaıdy Aqordanyń baspasóz qyzmeti.
Prezıdent áýe habtaryn damytý kólik-logıstıka salasyndaǵy strategııalyq basymdyqtardyń biri sanalatynyn atap ótti.
Memleket basshysynyń baǵalaýynsha, Groupe ADP kompanııasynyń Almaty áýejaıy ınfraqurylymyn basqarýǵa atsalysýy tabysty seriktestiktiń jarqyn úlgisi bolmaq.
Qasym-Jomart Toqaev kompanııanyń jańa halyqaralyq termınal salý sekildi birqatar mańyzdy jobany tıimdi júzege asyrǵanyna toqtaldy. Bul ınfraqurylymnyń jańarýyna jáne jolaýshylar sanynyń jylyna 14 mıllıonǵa deıin artýyna múmkindik berdi.
Fılıpp Paskal Almaty áýejaıyn damytýǵa arnalǵan uzaqmerzimdi bas jospardyń oryndalý barysy týraly aqparat berdi. 2050 jylǵa deıingi ınvestıtsııalyq baǵdarlamany júzege asyrý áýejaıdyń ótkizý qabiletin jylyna 55 mıllıon jolaýshyǵa deıin ulǵaıtýǵa jol ashady.
Sondaı-aq kezdesýde óńirlerdegi áýejaılardy órkendetý boıynsha jańa birlesken jobalardy ilgeriletý perspektıvasy talqylandy.
Groupe ADP bas dırektory memleket avıatsııalyq ınfraqurylymnyń qyzmetine arnalǵan ońtaıly normatıvtik-quqyqtyq baza jasaqtaǵanyn aıtty.
Memleket basshysy Brıýsselge sapary aıasynda qol qoıylǵan Qazaqstan Úkimeti men Eýropalyq Odaq arasyndaǵy áýe tasymalynyń keıbir aspektileri týraly kelisim salany damytýdaǵy mańyzdy qadam bolatynyna senim bildirdi.
Groupe ADP – áýejaı ınfraqurylymyn basqarý salasy boıynsha álemdegi jetekshi kompanııalardyń biri. Top Parıjdiń negizgi áýejaılaryn basqarady jáne 20-dan astam eldiń áýejaıyna TAV Airports sekildi enshiles qurylymdar arqyly ıelik etedi.
Aıta keteıik, osyǵan deıin Qasym-Jomart Toqaev Jahandyq ózgerister ınstıtýtynyń atqarýshy tóraǵasy Tonı Blermen kezdesti.
