Memleket basshysy: ǵylymı ázirlemeler elge naqty paıda ákelýi kerek

ALMATY. KAZINFORM – Bul týraly Prezıdent ál-Farabı atyndaǵy QazUÝ-da ǵylymı qoǵamdastyqpen kezdesýinde aıtty. 

Ókinishke qaraı, bul buljymas aksıomany qaıtalaýǵa týra kelip tur.

– Ǵylym qoryna ınnovatsııany yntalandyrýǵa arnalǵan jańa quzyretter berildi. Biraq jumystyń nátıjesi joq. Qordyń qyzmetin qaıta saralaý qajet. Ózimizdi aldaýdyń ne qajeti bar? Ǵylym bar sııaqty, biraq onyń naqty paıdasyn kórmeı otyrmyz. Maǵan úsh myńnan astam qoldanbaly ǵylymı jobanyń tek 193-i ǵana kommertsııalandyrýǵa laıyq dep tanylǵany, al naryqqa bar-joǵy 29 joba shyqqany baıandaldy.

Ókinishke qaraı, ındýstrııaǵa áseri, qaıtarymy óte az. Taǵy bir keleńsiz jaıt: zamanaýı óndiris qurýǵa bólingen jer telimderi bos jatyr. Al jumysynda olqylyqtarǵa jol bergen Ǵylym qory memleket qarjysyn qaıtarmaǵany óz aldyna, tipti, quqyq qorǵaý organdaryna da shaǵymdanbaǵan. Eshteńe bolmaǵan sııaqty. Alaıda quqyq qorǵaý organdary grant retinde alynǵan aqshanyń keıin Ulttyq memlekettik ǵylymı-tehnıkalyq saraptama ortalyǵy men Ǵylym qory qyzmetkerlerine aýdarylǵanyn áshkereledi. Tekseris nátıjesi boıynsha 11 qylmystyq is qozǵaldy, - dedi Memleket basshysy.

Qasym-Jomart Toqaev barlyq ǵylymı ázirleme qoldanbaly mánge ıe bolýǵa tıis,  ekonomıkanyń naqty sektorlaryna belsendi engizilýi kerek ekenin aıtty.

Ulystyń uly kúni – Naýryz meıramy qarsańynda ózim shynaıy qurmetpen qaraıtyn ǵylymı qyzmetkerler týraly osyndaı uıatty derekterdi ashyq aıtý ońaı emes. Biraq Konstıtýtsııadaǵy Zań men tártip qaǵıdaty ǵylym qaıratkerlerine de qatysty. Ǵylymı qoǵamdastyqtyń abyroı-bedeline nuqsan keltiretin osy jaǵymsyz jaıt jaýapkershiliktiń bolmaýy, baqylaýdyń nasharlyǵy jáne protsesterdi tsıfrlandyrýdyń tómen deńgeıi qaıda ákelip soǵatynyn anyq kórsetti. Barlyq ǵylymı ázirleme qoldanbaly mánge ıe bolýǵa tıis. Ekonomıkanyń naqty sektorlaryna belsendi engizilýi kerek. Álbette qazaq ǵylymynyń damýynda sátti mysaldar barshylyq. Aýyzdy qý shóppen súrte berýge bolmaıdy. Biraq shynaıy tabysqa jetkimiz kelse, sátsizdikterden sabaq alýymyz kerek. Týrasyn aıtqan jón. Shyndyqty burmalaýǵa túbegeıli qarsymyn. Biraq qur sóz ben maqtangershilikti jaqtyrmaımyn, – dedi Memleket basshysy. 

Aıta ketelik Prezıdent ǵylymdy qarjylandyrý isine qatań tártip kerek ekenin aıtqan edi.