Memleket basshysy ǵalymdar men zertteýshilerdiń kezdesýin Astanada ótkizýdi usyndy
ACTANA. KAZINFORM – Prezıdent Qazaqstan Japonııamen birlesken Next-Generation SmartMining Plus jobasynyń iske qosylýyn quptaıtynyn aıtty. Bul týraly Aqordanyń baspasóz qyzmeti habarlady.
Memleket basshysy Ortalyq Azııada sırek kezdesetin elementter men ózge de asa mańyzdy mıneraldardyń mol qory bar ekenin atap ótti. Bul álemniń jańa energetıkalyq júıege kóshýine qajetti resýrs sanalady.
- Óńirimiz taza ári qýat únemdeıtin óndiristerdi atalǵan resýrstarmen qamtamasyz ete alady. Qazaqstan Japonııamen qazba baılyqtardy barlaý, óndirý jáne óńdeý isi boıynsha yntymaqtastyqty jandandyrýǵa múddeli. Bul rette tereń óńdeýge jáne ornyqty óndiris tizbegin qalyptastyrýǵa den qoıa otyryp, tolyqqandy ónerkásip klasterin qurýǵa basymdyq beremiz. Sondyqtan Qazaqstan Japonııamen birlesken Next-Generation SmartMining Plus jobasynyń iske qosylýyn quptaıdy. Bul bastama óndiris úderisin tsıfrlandyryp, ekologııalyq ornyqtylyqty arttyrady, - dedi Prezıdent.
Memleket basshysy ornyqty aýyl sharýashylyǵy salasynda birlesken zertteý platformasyn qurýdy usyndy.
- Elimiz aýyl sharýashylyǵyn damytýǵa aıryqsha mán beredi. Ortalyq Azııada qýatty agroónerkásip kesheni burynnan bar. Sondyqtan aımaq jahandyq azyq-túlik qaýipsizdigin qamtamasyz etý isinde mańyzdy ról atqara alady. Qazaqstan Japonııanyń resýrs únemdeý tehnologııasyna, shólge tózimdi daqyldar selektsııasyna, «aqyldy» fermalardy damytý tájirıbesine qyzyǵýshylyq tanytady. Osy oraıda ornyqty aýyl sharýashylyǵy salasynda japon ǵalymdarynyń jáne sarapshylarynyń qatysýymen Zertteý platformasyn qurýdy usynamyz. Astanada qoldanbaly ǵylymdar salasynda ǵalymdar men zertteýshilerdiń alǵashqy kezdesýin «Ortalyq Azııa – Japonııa» formatynda uıymdastyrýdy usynamyn, - dedi Memleket basshysy.
Aıta keteıik, Prezıdent Qasym-Jomart Toqaev «Ortalyq Azııa – Japonııa» dıalogynyń birinshi sammıtinde sóz sóıledi.
Prezıdent Japonııa Úkimetiniń Aqtaý portyndaǵy kedendik rásimderdi jetildirýge atsalysý sheshimin quptady.