Memleket basshysy Frantsııa Prezıdentimen keńeıtilgen quramda kelissóz júrgizdi
PARIJ. KAZINFORM - Qasym-Jomart Toqaev Frantsııa tarapynyń qazaq delegatsııasyn ystyq yqylaspen qarsy alǵanyn atap ótip, Emmanıýel Makronǵa alǵys aıtty. Bul týraly Aqordanyń baspasóz qyzmeti habarlady.
– Osy saparyma aıryqsha mán beremin. Bul Qazaqstan men Frantsııa arasyndaǵy strategııalyq seriktestiktiń jańa belesi bolmaq. Búgingi kelissózder jáne qabyldanatyn Birlesken deklaratsııa áriptestigimizdi kúsheıtilgen strategııalyq deńgeıge kóterýge yqpal etedi. Osy oraıly sátte Sizdi Parıjde ótken otyz úshinshi Olımpıada jáne Paralımpıada oıyndarynyń tabysty ótýimen shyn júrekten quttyqtaımyn. Bul jahandyq sporttaǵy asa aýqymdy ári aıtýly oqıǵa ekeni anyq. Álem jurtshylyǵy joǵary deńgeıde ótken dodaǵa kýá boldy. Sizdiń elińiz 2030 jyly frantsýz Alpilerinde jıyrma altynshy Qysqy Olımpıada oıyndaryn da tamasha deńgeıde uıymdastyratynyna senimdimin, – dedi Memleket basshysy.
Qasym-Jomart Toqaev Frantsııa Prezıdentiniń byltyr Astanaǵa jasaǵan sapary barysynda qol jetkizilgen ýaǵdalastyqtar men kelisimder qazaq-frantsýz baılanysyn jan-jaqty tereńdetýge zor serpin bergenin aıtty.
– Qazirgi tańda memleketterimiz arasynda belsendi jáne senimdi saıası dıalog bar. Qazaqstan men Frantsııa halyqaralyq sahnada tyǵyz baılanys ornatyp, kópjaqty qurylymdar aıasynda beıbitshilik pen ornyqty damý qaǵıdattaryn ilgeriletýde. Frantsııa – bizdiń asa iri saýda seriktesterimizdiń biri. Sizdiń elińiz Qazaqstan ekonomıkasyna mol ınvestıtsııa salyp otyrǵan jetekshi elderdiń qatarynda. Búginde Qazaqstanda frantsýz kapıtaly bar 200-den astam kompanııa men birlesken kásiporyn jumys istep jatyr. Qazaqstanda belsendi jumys isteýge yntaly frantsýz bıznes ókilderine shynaıy rızashylyǵymdy bildiremin, – dedi Qasym-Jomart Toqaev.
Qazaqstan Prezıdenti mádenı-gýmanıtarlyq baılanystar, sonyń ishinde bilim berý, ǵylym, medıtsına jáne tarıh salalaryndaǵy yntymaqtastyq qarqyndy damyp kele jatqanyna nazar aýdardy. Sondaı-aq álemge áıgili Gıme murajaıynda ashylǵan Qazaqstanyń ulttyq ónerine arnalǵan kórmeni aıryqsha rızashylyqpen atap ótti.
Sóz sońynda Qasym-Jomart Toqaev búgingi sapardyń qorytyndylary qos halyqtyń órkendeýine ıgi yqpal etetinine senim bildirdi. Frantsııa Prezıdenti qazaq-frantsýz yntymaqtastyǵynyń damýyna tyń serpin beretin kelissózderdiń mańyzyna toqtaldy.
– Sizdiń arqańyzda sońǵy jyldary eki el arasyndaǵy seriktestik aıtarlyqtaı nyǵaıdy, – dedi Emmanıýel Makron.
Kelissózder barysynda memleketter basshylary mashına jasaý, kólik-logıstıka, aýyl sharýashylyǵy, energetıka, ónerkásiptik kooperatsııa, klımat, tsıfrlyq damý jáne densaýlyq saqtaý salalaryndaǵy yntymaqtastyqtyń qazirgi jaı-kúıi men perspektıvasyn egjeı-tegjeıli talqylady. Budan bólek, mádenı-gýmanıtarlyq baılanystardy nyǵaıtýǵa mán berildi.
Prezıdentter óńirlik jáne halyqaralyq kún tártibindegi birqatar ózekti másele jóninde pikir almasty.
Aıta keteıik, buǵan deıin Prezıdenttiń Frantsııa Respýblıkasyna memlekettik saparmen barǵanyn jazǵanbyz.
Sonymen qatar, Kazinform tilshisi Qazaqstan men Frantsııa qarym-qatynasynyń nyǵaıýyn jan-jaqty qamtyp kórdi.
Elıseı saraıynda Qazaqstan Prezıdenti Qasym-Jomart Toqaevty resmı qarsy alý rásimi ótti.
