Memleket basshysy Franchesko Depaskýaleni qabyldady
ASTANA. KAZINFORM – Memleket basshysy Sot tóreliginiń tıimdiligi jónindegi Eýropalyq komıssııanyń prezıdenti Franchesko Depaskýaleni qabyldady. Bul týraly Aqordanyń baspasóz qyzmeti málim etti.
«Qazaqstan Respýblıkasy Sýdıalarynyń IX sezi aıasynda Qasym-Jomart Toqaev Sot tóreliginiń tıimdiligi jónindegi Eýropalyq komıssııanyń (CEPEJ) prezıdenti Franchesko Depaskýalemen kezdesip, sot júıesiniń reformasy jóninde pikir almasty», - delingen habarlamada.
Prezıdent Uıym sot tóreliginiń halyqaralyq standarttaryn qalyptastyrýda mańyzdy ról atqaratynyn atap ótip, Qazaqstan tarapy quqyq qorǵaý mehanızmderiniń ozyq tájirıbesin otandyq sot júıesine engizýge aıryqsha mán beretinine nazar aýdardy.
Qasym-Jomart Toqaev elimizde quqyqtyq jáne demokratııalyq qaǵıdattarǵa arqa súıeıtin memleket qurý úderisi qarqyndy júrip jatqanyn aıtty. Bul rette sot júıesin reformalaý jáne zań ústemdigin qamtamasyz etý óte mańyzdy ról atqarady.
Óz kezeginde Franchesko Depaskýale adam quqyqtary men sot tóreliginiń tıimdiligin qamtamasyz etý máselesinde yntymaqtastyqqa árdaıym daıyn ekenin jetkizip, Qazaqstanda osy salada júrgizilip jatqan reformalardy oń baǵalady.
