Memleket basshysy Eýropalyq komıssııanyń vıtse-prezıdenti Kaıa Kallaspen kezdesti

ASTANA. KAZINFORM – Qazaqstan Prezıdenti Eýropa Odaǵynyń Syrtqy ister jáne qaýipsizdik saıasaty jónindegi Joǵarǵy ókili – Eýropalyq komıssııanyń vıtse-prezıdenti Kaıa Kallaspen kezdesti. Bul týraly Aqordanyń baspasóz qyzmeti habarlady. 

Қасым-Жомарт Тоқаев пен Кая Каллас халықаралық және өңірлік күн тәртібіндегі өзекті тақырыптар жөнінде пікір алмасты
Фото: Ақорда

Kezdesýde Qazaqstannyń Eýropa Odaǵymen sanqyrly yqpaldastyǵynyń perspektıvasy talqylandy. Saýda-ekonomıkalyq yntymaqtastyqtyń mańyzdy baǵyttaryna, atap aıtqanda, energetıka, ónerkásip, tsıfrlandyrý, sondaı-aq Transkaspıı halyqaralyq kólik dálizin damytýdy kózdeıtin iri ınfraqurylymdyq jobalardy júzege asyrý máselelerine erekshe mán berildi.

Memleket basshysy Eýropalyq komıssııanyń vıtse-prezıdenti Kaıa Kallaspen kezdesti
Foto: Aqorda

Kaıa Kallastyń aıtýynsha, Qazaqstan Eýropa Odaǵymen seriktestik jáne yntymaqtastyq jónindegi kelisimge qol qoıǵan aımaqtaǵy alǵashqy elderdiń biri. Bul ekijaqty qarym-qatynastyń deńgeıi joǵary ekenin kórsetedi. Ol Eýropalyq komıssııa men Qazaqstan arasynda vıza berý tártibin jeńildetý jónindegi kelisimdi bekitý úderisi bastalǵanyn málimdedi.

Memleket basshysy qazaqstandyqtar atalǵan jańalyqty óte jyly qabyldaǵanyn atap ótip, bul qadam eýropalyq eldermen jeke jáne iskerlik qatynastardy nyǵaıtýǵa mol múmkindik beretinin aıtty.

Memleket basshysy Eýropalyq komıssııanyń vıtse-prezıdenti Kaıa Kallaspen kezdesti
Foto: Aqorda

Budan bólek, Qasym-Jomart Toqaev pen Kaıa Kallas halyqaralyq jáne óńirlik kún tártibindegi ózekti taqyryptar jóninde pikir almasty.

Memleket basshysy jahandyq turaqsyzdyqty eskere otyryp, álemde bolyp jatqan kúrdeli oqıǵalarǵa baǵa berýde baıyptylyq pen jaýapkershilik tanytýdyń aıryqsha mańyzǵa ıe ekenine toqtaldy. Prezıdenttiń pikirinshe, Qazaqstan barlyq ózekti halyqaralyq máseleler men qaqtyǵystardy dıplomatııalyq kelissózder arqyly sheshýdi berik ustanady.

Qasym-Jomart Toqaev bıyl qurylǵanyna 80 jyl tolǵan BUU-nyń áli de ámbebap ári balamasy joq uıym sanalatynyn jetkizdi. Sonymen qatar barlyq memleketter qurylym Jarǵysy men álem elderi moıyndaǵan halyqaralyq quqyq qaǵıdattaryn saqtaýǵa tıis dep sanaıdy.

Kezdesýde sondaı-aq «Ortalyq Azııa – Eýropa Odaǵy» formatyndaǵy yqpaldastyqtyń jaı-kúıi qaraldy.

Aıta ketelik Prezıdent «Ortalyq Azııa» halyqaralyq ónerkásiptik kooperatsııasyna qatysty zańǵa qol qoıǵan edi

Сейчас читают