Memleket basshysy Erlan Qoshanovty qabyldady
ASTANA. KAZINFORM – Memleket basshysy Májilis Tóraǵasy Erlan Qoshanovty qabyldady. Bul týraly Aqordanyń baspasóz qyzmeti habarlady.
Erlan Qoshanov palata qyzmeti týraly aqparat berdi.
Depýtattar jumys barysynda Prezıdent Joldaýy men el damýy boıynsha bergen tapsyrmalardy zańnamalyq turǵyda ýaqtyly ári sapaly qamtamasyz etýge erekshe mán beretinin baıandady. Búginde 15 zań qabyldanyp, Senatqa joldandy. Májilis qaraýynda 77 zań jobasy bar.
Jyl sońyna deıin Qurylys, Tsıfrlyq kodekster men «Bank qyzmeti týraly» Zańdy qabyldaý josparlanyp otyr. Sondaı-aq saılaý, tutynýshylardyń quqyǵyn qorǵaý, quqyq buzýshylyqtyń aldyn alý sekildi zań jobalaryna qatysty jumys júrgizilip jatyr.
Depýtattar jergilikti memlekettik jáne ózin-ózi basqarý týraly zańnamaǵa túzetýler engizýge, sondaı-aq kreatıvti ındýstrııa, ǵylymı zertteý aýmaqtaryn damytý, tarıhı-mádenı mura nysandaryn qorǵaý, baǵbandyq sharýashylyq seriktestikterdi memlekettik qoldaý boıynsha zań jobalaryna bastamashy boldy.
Zań shyǵarý jumysy jurtshylyqtyń, sarapshylardyń jáne BAQ ókilderiniń qatysýymen ashyq júrgizilip jatyr. Barlyq saıası partııalardyń fraktsııalary óz elektoratynyń suranysyna sáıkes usynystaryn belsendi túrde engizip jatyr. Mańyzdy zań jobalary Qoǵamdyq palatanyń otyrystarynda qaralady.
Depýtattar Memleket basshysynyń Jasandy ıntellektige qatysty bastamalaryn iske asyrýǵa belsendi atsalysyp kele jatqanyn aıtty. Qyrkúıek aıynyń sońynda Májilis «Jasandy ıntellekt týraly» Zań qabyldap, Senatqa joldady. Sonymen qatar qazaqstandyq jáne sheteldik sarapshylardyń qatysýymen parlamenttik tyńdaý ótkizildi.
Depýtattardyń jáne Energetıka mınıstrliginiń bastamasymen Aqtaýda munaı-gaz salasyndaǵy mashına jasaý isin damytý forýmy ótti. Munaı-gaz sektoryndaǵy satyp alýlarda qazaqstandyq úlesti júıeli túrde arttyrý jaıly sheshim qabyldandy. Depýtattar muny udaıy baqylaýda ustaıdy.
Sonymen qatar arlamenttik dıplomatııa aıasynda atqarylǵan jumys jaıynda málimet berdi. Elimizge Mońǵolııa Uly Memlekettik Hýralynyń jáne Majarstan Memlekettik jınalysynyń tóraǵalary resmı saparmen keldi.
Onyń aıtýynsha, kóptegen eldiń parlamentterimen dostyq toptary belsene qyzmet atqarýda, zań shyǵarý salasynda tájirıbe almasý jolǵa qoıylǵan jáne memleketaralyq jobalardy qoldaý boıynsha jumys júrgizilip jatyr.
Depýtattar UQShU Parlamenttik Assambleıasy, TúrkPA, TMD Parlamentaralyq assambleıasy jáne basqa da kópjaqty uıymdar aıasynda tabysty qyzmet atqaryp keledi.
Aıta keteıik, Májilis qurylys qyzmetin qaǵazbastylyqtan aryltatyn qujatty qaraıdy.