Memleket basshysy EO jáne Eýropalyq ınvestıtsııalyq banktiń resmı tulǵalarymen kezdesti
ASTANA. KAZINFORM — Prezıdent Saýda jáne ekonomıkalyq qaýipsizdik máseleleri jónindegi eýrokomıssar Marosh Shefchovıchpen, Eýropalyq Odaqtyń Ortalyq Azııa boıynsha arnaıy ókili Edýards Stıpraıspen jáne Eýropalyq ınvestıtsııalyq banktiń vıtse-prezıdenti Marek Moramen kezdesý ótkizdi. Bul týraly Aqordanyń baspasóz qyzmeti habarlady.
EO jáne EIB joǵary laýazymdy ókilderimen áńgimelesý barysynda Qasym-Jomart Toqaev EO kóshbasshylary Antonıý Koshtamen jáne Ýrsýla fon der Lıaıenmen ótken kelissózder nátıjesin joǵary baǵalap, kezdesýde Astana men Brıýssel arasyndaǵy strategııalyq seriktestikti odan ári nyǵaıtýǵa ózara beıil ekenderin rastaǵanyn aıtty.
Memleket basshysy bul sapardyń ekonomıkalyq quramdas bóligi, atap aıtqanda, quny 12 mıllıard dollardan asatyn kommertsııalyq kelisimder men memorandýmdarǵa qol qoıylýy eýropalyq bıznestiń Qazaqstan ekonomıkasyna jáne elde júrgizilip jatqan reformalarǵa degen senimin baıqatatynyn jetkizdi.
Osy oraıda Prezıdent Eýropalyq ınvestıtsııalyq bankpen seriktestiktiń nátıjeli sıpatyna kóńili tolatynyn atap ótip, atalǵan qarjy ınstıtýtymen aldaǵy yntymaqtastyq Qazaqstannyń ornyqty ekonomıkalyq damýyna jáne óńirlik ózara baılanystardy arttyrý baǵytyndaǵy bastamalaryn ilgeriletýge septigin tıgizetinine senim bildirdi.
Saýda jáne ekonomıkalyq qaýipsizdik máseleleri jónindegi eýrokomıssar Marosh Shefchovıch Prezıdent Qasym-Jomart Toqaevtyń resmı sapary Eýropalyq Odaq pen Qazaqstan arasyndaǵy qarym-qatynastyń jańa kezeńine jol ashatynyn atap ótti.
Ol osy sapar aıasynda qol qoıylatyn mańyzdy kommertsııalyq kelisimder saýda-ekonomıkalyq yntymaqtastyqty nyǵaıtý boıynsha uzaq jyldar boıǵy birlesken kúsh-jigerdiń nátıjesi ekenine toqtaldy.
Kezdesý sońynda taraptar ózara múddeli salalardaǵy ortaq bastamalardy ilgeriletý maqsatynda konstrýktıvti dıalogty jalǵastyrýǵa ýaǵdalasty.
Aıta ketelik Qasym-Jomart Toqaev Eýropalyq odaq basshylarymen Birlesken málimdeme qabyldaǵan edi.
