Italııalyq kompanııa Mańǵystaý óńirinde gaz óńdeý zaýytyn salady
RIM. KAZINFORM – Memleket basshysy Qasym-Jomart Toqaev Italııaǵa resmı sapary aıasynda Eni kompanııasynyń bas operatsııalyq dırektory Gvıdo Brýskony qabyldady.
Aqordadan málim etkendeı, áńgimelesý barysynda Qazaqstan men Eni kompanııasy arasyndaǵy ótken jylǵy yntymaqtastyqtyń nátıjeleri jáne aldaǵy yqpaldastyqtyń áleýeti qarastyryldy.
Byltyr Kaspıı qubyr jelisi konsortsıýmy arqyly 63,5 mıllıon tonna munaı tasymaldandy. Bul – rekordtyq kórsetkish. Qashaǵan jáne Qarashyǵanaq ken oryndarynda munaı óndirýdiń jalpy kólemi 30,8 mıllıon tonnany qurady.
Prezıdenttiń pikirinshe, Qazaqstan Úkimeti men konsortsıýmnyń barlyq qatysýshysynyń, sonyń ishinde Eni kompanııasynyń birlesken kúsh-jigeriniń arqasynda osyndaı nátıjege qol jetkizildi.
Qasym-Jomart Toqaev Aqtóbe jáne Túrkistan oblystarynda jalpy qýaty 150 MVt bolatyn jel jáne kún elektr stantsııalarynyń qurylysyna qatysty júzege asyrylǵan jobalardy joǵary baǵalady.
Sonymen qatar Memleket basshysyna ıtalııalyq kompanııanyń Mańǵystaý oblysynda gaz óńdeý zaýytyn, qýaty 250 MVt bolatyn gıbrıdti elektr stantsııasyn salý jáne aldaǵy ýaqytta bıodızelge óńdeý úshin ósimdik maıyn óndirý jospary týraly málimet berildi.
