Memleket basshysy Energetıka mınıstri Erlan Aqkenjenovti qabyldady
ASTANA. KAZINFORM – Qasym-Jomart Toqaevqa elimizdegi otyn-energetıka kesheniniń jaı-kúıi, negizgi jobalardy iske asyrý barysy men salany odan ári damytý jospary týraly esep berildi.
Prezıdentke otandyq munaı óńdeý zaýyttarynyń qalypty jumys istep turǵany jóninde baıandaldy. Bıyl munaı óńdeý kólemin 17,6 mıllıon tonnaǵa jetkizý josparlanyp otyr. Sondaı-aq mınıstr Munaı óńdeý salasyn damytýdyń 2040 jylǵa deıingi tujyrymdamasy ázirlenip jatqanyn málimdedi.
Erlan Aqkenjenov gaz óndirý, Qashaǵan, Qarashyǵanaq ken oryndarynda jáne Jańaózen qalasynda jańa gaz óńdeý zaýyttaryn salý josparyn tanystyrdy. «Beıneý – Bozoı – Shymkent» magıstraldi gaz qubyrynyń ekinshi jelisi jáne «Taldyqorǵan – Úsharal» gaz qubyrynyń qurylysy jalǵasyp jatyr. Qasym-Jomart Toqaevqa qýaty 26 gıgavattan asatyn jańa generatsııalaý keshenderin iske qosý kózdelip otyrǵany aıtyldy. Bul 2035 jylǵa qaraı ishki suranysty óteý maqsatynda qolǵa alyndy.
Kezdesý sońynda Prezıdent otyn-energetıka sektoryn odan ári damytý boıynsha birqatar tapsyrma berdi. Memleket basshysy munaı-gaz, munaı-gaz hımııasy jáne elektr energetıkasy salalarynda josparlanǵan ınfraqurylymdyq jobalardy ýaqtyly ári sapaly iske asyrýdyń mańyzyn atap ótti. Qasym-Jomart Toqaev eldiń energetıkalyq qaýipsizdigin saqtaýǵa, turǵyndar men óndiristik nysandardy qýat kózimen turaqty qamtamasyz etýge basa nazar aýdarý qajet dep sanaıdy. Prezıdent ınvestıtsııalyq klımatty jaqsartý úshin keshendi sharalar qabyldaý, geologııalyq barlaýǵa strategııalyq ınvestorlardy tartý mindetterin júktedi.
Buǵan deıin Ónerkásip mınıstri Prezıdentti vedomstvonyń aldaǵy josparlarymen tanystyrdy.