Memleket basshysy Energetıka mınıstri Erlan Aqkenjenovti qabyldady
ASTANA.KAZINFORM - Qasym-Jomart Toqaevqa elimizdegi otyn-energetıka kesheniniń jaǵdaıy, negizgi jobalardy júzege asyrý barysy jáne sektordy odan ári damytý jospary jóninde esep berildi. Bul týraly Aqordanyń baspasóz qyzmeti habarlady.
Erlan Aqkenjenov munaı salasynda ornyqty dınamıka saqtalyp turǵanyn aıtty. Sonymen qatar munaı óńdeýdi ulǵaıtý josparyn baıandady.
Sol arqyly Shymkent munaı óńdeý zaýyty jylyna – 6-dan 12 mıllıon tonnaǵa, Atyraý munaı óńdeý zaýyty – 5,5-ten 6,7 mıllıon tonnaǵa jáne Pavlodar munaı-hımııa zaýyty 5,5-ten 9 mıllıon tonnaǵa deıin óndiristik qýatyn arttyrady.
2029 jylǵa deıin salynatyn jańa energetıkalyq nysandar jaıynda málimet berdi.
Bıyl Almaty qalasynda ekinshi jylý elektr ortalyǵynyń qurylysy aıaqtalady. Sonymen qatar Qyzylorda men Túrkistan oblystarynda bý-gaz qondyrǵylary bazasynda elektr stantsııasy boı kóteredi.
«Kómir óndirýdi damytý» ulttyq jobasynyń ázirlený barysy týraly aqparat usyndy.
Prezıdent otyn-energetıka sektoryn odan ári damytý, sonyń ishinde munaı-gaz, munaı-gaz hımııasy jáne elektr energııasy salalarynda josparlanǵan jobalardy ýaqytyly ári sapaly júzege asyrý boıynsha birqatar tapsyrma berdi.
Óndiristik nysandardyń tıimdiligin arttyrý úshin tsıfrlyq sheshimder men jasandy ıntellekt tehnologııalaryn belsendi túrde engizý mańyzdy ekenine toqtaldy.
Aıta keteıik, Memleket basshysy Oman Sultany Haısam ben Tarıq Ál Saıdpen telefon arqyly sóılesti.
