Memleket basshysy Energetıka mınıstri Almasadam Sátqalıevti qabyldady

Memleket basshysy Qasym-Jomart Toqaev Energetıka mınıstri Almasadam Sátqalıevti qabyldady, dep habarlaıdy Kazinform Aqordanyń resmı saıtyna silteme jasap.

Prezıdentke energetıka salasyn damytýdyń negizgi máseleleri men elimizdiń otyn-energetıka kesheniniń bıylǵy 10 aıdaǵy kórsetkishteri, sondaı-aq munaı-gaz jáne energetıka baǵyttaryndaǵy iri jobalardyń júzege asyrylýy jóninde málimet berildi.

Kezdesý barysynda Almasadam Sátqalıev atalǵan kezeń ishinde Qazaqstandaǵy munaı óndirý kólemi 74,8 mıllıon tonnany, al munaı ónimderiniń óndirisi 11,2 mıllıon tonnany quraǵanyn jetkizdi. Sonymen qatar 48,7 mıllıard tekshe metr gaz, 93,5 mıllıard kVt/caǵ elektr qýaty jáne 15,35 myń tonna ýran óndirilgen.

Qasym-Jomart Toqaevqa ulttyq elektr jelisin damytý úshin atqarylyp jatqan sharalar, bıyl maýsym aıynda iske qosylǵan elektr energııasyn naryqta satýdyń jańa mehanızmi jóninde baıandaldy.

Memleket basshysyna qysqy jylytý maýsymy qalypty ótý úshin qosymsha baqylaý ornatylǵany týraly aqparat berildi. Atap aıtqanda, energetıka nysandaryn qamtamasyz etý maqsatynda 5,5 mıllıon tonna kómir men 100 myń tonna mazýt qory daıyndalǵan.

Buǵan qosa Memleket basshysyna vedomstvonyń el aımaqtaryna odan ári gaz qubyryn tartý jospary tanystyryldy.

Kezdesý sońynda Prezıdent jylytý maýsymynyń barysyn jáne energetıka ınfraqurylymyn jańǵyrtý jobalarynyń iske asyrylýyn aıryqsha baqylaýda ustaýdy, sondaı-aq ishki naryqty janar-jaǵarmaımen jáne suıytylǵan munaı gazymen úzdiksiz qamtamasyz etý sharalaryn qabyldaýdy tapsyrdy.