Memleket basshysy: Endi azamattarǵa avtokólikti lızıngpen alý múmkindigi usynylady

ASTANA. KAZINFORM — Memleket basshysy bul týraly KIA Qazaqstan avtomobıl zaýytynyń ashylýynda aıtty. 

Prezıdent jaqynda Úkimetke ekonomıkalyq ahýaldy turaqtandyrý úshin naqty sharalar ázirleý týraly tapsyrma berilip, osyǵan baılanysty birqatar mańyzdy sheshim qabyldanǵanyn aıtty.

— Soǵan sáıkes endi azamattarǵa avtokólikti lızıngpen alý múmkindigi usynylady. Sonyń arqasynda avtokólikter halyqqa meılinshe qoljetimdi bola túspek. Elimizde KIA Qazaqstan zaýytynyń iske qosylýy osy salany tehnologııalyq turǵydan jańǵyrtýǵa zor serpin bereri sózsiz. Kásiporyn bolashaqta basqa da jańa kólik túrlerin shyǵarady dep senemin. Osylaısha, álemdik ozyq talaptarǵa saı kólikterimizdi syrtqy naryqqa, ıaǵnı shetelge shyǵarýǵa múmkindik bolmaq. Qazaqstan jahandyq avtokólik ónerkásibiniń damýyna bar kúsh-jigerin salýǵa daıyn, — dedi Prezıdent.

KIA Qazaqstan zaýytyn salý týraly sheshim 2023 jyly qabyldandy. Kásiporyn Qostanaı qalasynyń ındýstrııalyq aımaǵyndaǵy 62,95 gektar aýmaqta ornalasqan. Zaýyt jylyna 70 myń kólik qurastyra alady. Investıtsııa kólemi — 131,5 mıllıard teńge. Kásiporynda 1500 jumys orny ashylǵan. Al onyń ónimi Qazaqstanǵa, Ortalyq Azııa jáne EAEO elderiniń naryqtaryna shyǵarylady. 

Aıta ketelik Memleket basshysy telekópir arqyly KIA Qazaqstan avtomobıl zaýytyn ashty.