Memleket basshysy Emmanıýel Makronmen Rııad qalasynda kezdesti

ASTANA. KAZINFORM — Memleket basshysy Qasym-Jomart Toqaev Rııad qalasynda ótip jatqan One Water sammıti aıasynda Frantsııa Prezıdenti Emmanıýel Makronmen kezdesti, dep habarlaıdy Aqorda. 

Prezıdent óziniń jaqynda Frantsııaǵa jasaǵan memlekettik saparyn yqylaspen eske alyp, Qazaqstan delegatsııasyna kórsetken erekshe qonaqjaılyǵy úshin Emmanıýel Makronǵa rızashylyq bildirdi.

Memleket basshysy qazaq-frantsýz qarym-qatynastaryn berik strategııalyq seriktestik deńgeıine jetkizý úshin Parıjde qol jetkizilgen ýaǵdalastyqtardy júzege asyrýdyń mańyzdy ekenin atap ótti.

— Kelissózderdiń qorytyndysyna jáne tıisti qujattarǵa qol qoıylǵanyna kóńilim toldy. Frantsııaǵa memlekettik saparym uzaqmerzimdi ekonomıkalyq ósimge jáne elderimiz arasyndaǵy baılanysty nyǵaıtýǵa jasalǵan mańyzdy qadam boldy. Birneshe aptadan keıin-aq túrli baǵyttaǵy negizgi kelisimderdiń júzege asyp, naqty nátıje bere bastaǵany qýantady, — dedi Qasym-Jomart Toqaev.

Emmanıýel Makron Qazaqstan men Frantsııa arasyndaǵy yqpaldastyqtyń qarqyndy damyp kele jatqanyna toqtalyp, klımattyń ózgerýine qarsy kúres jáne «jasyl» ekonomıkany damytý sektorlarynda kúsh biriktirýdiń máni zor ekenin jetkizdi.

Taraptar energııa tıimdiligi, taza tehnologııalar, sý resýrstaryn basqarý, ınnovatsııalar, derekter almasý jáne jasandy ıntellekt salalaryndaǵy yntymaqtastyqty jandandyrý perspektıvalaryn talqylady.

Kezdesýde prezıdentter óńirlik jáne halyqaralyq kún tártibindegi ózekti máseleler jóninde pikir almasty.

Eske sala keteıik, Memleket basshysy Qasym-Jomart Toqaev One Water sammıtine qatysý úshin Saýd Arabııasyna jumys saparymen bardy. Qasym-Jomart Toqaev One Water sammıti aıasynda Dúnıejúzilik bank tobynyń prezıdenti Adjaı Bangamen kezdesti. Memleket basshysy ortaq sýretke túsý rásimine qatysty.

Prezıdent Saýd Arabııasynyń astanasynda ótip jatqan One Water sammıtiniń ashylý saltanatynda sóz sóıledi.