Memleket basshysy: El qoldaýyna ıe bolǵan naǵyz Halyq Konstıtýtsııasy tuǵyryna qondy

TÚRKІSTAN. KAZINFORM — Memleket basshysy Qasym-Jomart Toqaev Túrkistan oblysynyń jurtshylyǵymen kezdesýde sóz sóılep, qazir Qazaqstanda túbegeıli ózgerister kezeńi bastalǵanyn aıtty, dep habarlaıdy Aqordanyń baspasóz qyzmeti.

Prezıdent shet elderdiń basshylary, saıasatkerler jáne sarapshylar bizdiń Konstıtýtsııalyq reformaǵa asa zor yqylaspen qarap otyrǵanyn aıtty.

— Ony barshańyz jaqsy bilesizder. Bárimiz bir el bolyp Konstıtýtsııalyq reformany tabysty júzege asyrdyq. Bul reformanyń tarıhı mán-maǵynasy erekshe. Onyń el damýyna tıgizetin yqpaly asa kúshti bolaryna kúmán joq. Soǵan baılanysty shet elderdiń basshylary, saıasatkerler jáne sarapshylar bizdiń Konstıtýtsııalyq reformaǵa asa zor yqylaspen qarap otyrdy. Olar Qazaqstan konstıtýtsııalyq reformaǵa jańasha kózqaraspen qarap, keń aýqymdy ózgerister jasaǵanyn, elimiz Konstıtýtsııanyń mán-mazmunyn ózgertip, múlde jańa turpatty el bolǵanyn aıtyp jatyr. Jalpyhalyqtyq referendýmda azamattarymyz elimizdiń jarqyn bolashaǵy úshin, ıaǵnı, jas urpaqtarymyz úshin tarıhı tańdaýyn jasady. El qoldaýyna ıe bolǵan naǵyz Halyq Konstıtýtsııasy tuǵyryna qondy. Konstıtýtsııa — memleketimizdiń bolashaǵyna baǵdar bolatyn, ulttyq maqsat-muratymyzdy aıqyndaıtyn asa mańyzdy qujat, temirqazyq. Muny da aqıqat retinde búkil dúnıe júzindegi qaýymdastyq moıyndap jatyr, — dedi Toqaev. 

Budan buryn Prezıdent Túrkistan oblysynyń damý qarqynyn joǵary baǵalaǵanyn jazǵan edik.