Memleket basshysy eldiń JI salasyndaǵy strategııalyq baǵdaryn baıandady — sammıt
ASTANA.KAZINFORM — Aldaǵy ýaqytta elimizdiń tsıfrlyq damý baǵdaryn aıqyndaıtyn Digital Qazaqstan strategııasy bekitiledi. Bul týraly búgin Túrki memleketteri uıymynyń beıresmı sammıtinde Prezıdent Qasym-Jomart Toqaev málim etti.
— Qazaqstan tsıfrlyq el bolýdy kózdep otyr. Bul — elimizdiń aldynda turǵan strategııalyq maqsat. Osy jyl Qazaqstanda «Tsıfrlandyrý jáne jasandy ıntellekt jyly» dep jarııalandy. Astanada Alem.ai jasandy ıntellekt ortalyǵy ashyldy. Sondaı-aq biz eki sýperkompıýterdi iske qostyq. Kelesi qadam — «Derekterdi óńdeý ortalyqtarynyń alqabyn» qurý. Bul joba aımaq elderine jetekshi tehnologııalyq kompanııalar men jahandyq tsıfrlyq kapıtaldy tartýǵa zor múmkindik bermek. Biz Qazaqstandy aımaqtyq hab retinde damytý úshin kóshi-qon úderisin ońtaılandyra bastadyq. Shetelden kelgen kásipkerlerge, ınvestorlarǵa, bilikti mamandarǵa arnalǵan «Altyn vızany» engizdik. Mundaı vıza alǵan adamdar memlekettik jáne qarjylyq qyzmetterge Qazaqstan azamattarymen teń dárejede qol jetkize alady. Sonymen qatar elimizde Tsıfrlyq kodeks qabyldandy, Jasandy ıntellekt týraly zań kúshine endi. Biz bilim salasyndaǵy tsıfrlyq ınfraqurylymdy damytý jáne ozyq tehnologııany meńgergen pedagogterdi daıarlaý máselesine, bilim berý júıesin ár oqýshynyń qabiletine saı beıimdeý, olardyń derbes derekterin qorǵaý isine erekshe mán berip otyrmyz, — dedi Qasym-Jomart Toqaev.
Prezıdent osy maqsatpen jaqynda Jasandy ıntellektini orta bilim berý júıesine engizý týraly Jarlyqqa qol qoıǵanyn eske saldy. Bul da Qazaqstannyń bolashaǵy úshin jasalǵan óte mańyzdy qadam dep aıtýǵa bolady.
— Aldaǵy ýaqytta elimizdiń tsıfrlyq damý baǵdaryn aıqyndaıtyn Digital Qazaqstan strategııasy bekitiledi. Taıaýda Almaty qalasynda Turaqty damýǵa yqpal etetin tsıfrlyq sheshimder ortalyǵy ashyldy. Bul bastama Birikken Ulttar Uıymynyń aımaqtyq ekonomıkalyq jáne áleýmettik komıssııasynyń qoldaýymen júzege asyrylady. Qazaqstanǵa tilektestik tanytyp, osy jobanyń teń avtorlary retinde bul jumysqa mol úles qosqandaryńyz úshin Sizderge alǵys aıtamyn. Sonymen qatar naýryz aıynda Túrki keńesi sarapshylarynyń qatysýymen Shymkent qalasynda «Jasandy ıntellekt jáne tsıfrlyq damý» halyqaralyq konferentsııasy ótti. Bul is-shara elderimizdiń osy saladaǵy yntymaqtastyǵy men múddelestigin aıqyn kórsetti, — dedi Memleket basshysy.
Budan buryn habarlanǵandaı, Búgin Túrkistan qalasynda Prezıdent Qasym-Jomart Toqaevtyń qatysýymen Túrki memleketteri uıymynyń beıresmı sammıti bastaldy. Sammıtke TMU-ǵa múshe memleketterdiń basshylary — Túrkııa prezıdenti Rejep Taııp Erdoǵan, Ózbekstan prezıdenti Shavkat Mırzıeev pen Qyrǵyzstan prezıdenti Sadyr Japarov, Ázerbaıjan prezıdenti Ilham Álıev keldi.
Jasandy ıntellekt jáne tsıfrlyq damý» taqyrybyna arnalǵan jıyn Qazaqstannyń tóraǵalyǵymen uıymdastyrylyp otyr.
Aıta keteıik, Memleket basshysy Túrki órkenıeti ortalyǵyn qurý týraly sheshim qabyldady.
