Memleket basshysy eksporttyq áleýetti kúsheıtý qajettigin aıtty
ASTANA. KAZINFORM – Aýyl sharýashylyǵynyń eksporttyq áleýetin kúsheıtý qajet. Bul týraly Aýyl sharýashylyǵy qyzmetkerleriniń birinshi forýmynda Memleket basshysy Qasym-Jomart Toqaev aıtty.
«Aýyl sharýashylyǵynyń eksporttyq áleýetin kúsheıtý qajet. Munda kólik-logıstıka múmkindikteriniń shekteýli bolýy kedergi keltiredi. Mysaly, elimizdegi logıstıka men saqtaý júıeleriniń jetkilikti bolmaýynan aýyl sharýashylyǵy taýaryn óndirýshiler zor shyǵynǵa ushyrap otyr. Sondyqtan saqtaý ınfraqurylymyn, sonyń ishinde elevatorlar, kókónis jáne jemis-jıdek saqtaý qoımalaryn damytý mańyzdy baǵyt bolýǵa tıis. Syıymdylyǵy 700 myń tonna bolatyn qoımalar salý men jańǵyrtýdyń keshendi jospary qabyldandy. Bul jumysty udaıy baqylaýda ustaý kerek. Biz dástúrli ótkizý naryqtaryn saqtap qana qoımaı, túrli elderdiń talaptaryna beıimdelgen ıkemdi jetkizý júıesin qura otyryp, eksportty ártaraptandyrǵanymyz jón», — dedi Qasym-Jomart Toqaev.
Memleket basshysynyń atap ótýinshe, Ózbekstan, Ázerbaıjan, Túrikmenstan, Qyrǵyzstan jáne Aýǵanstanǵa josparly túrde astyq tasymaldaý jumysy bastaldy.
«Iran naryǵyna kirýge ruqsat alyp, 250 myń tonna arpa jónelttik. Sondaı-aq Qytaıǵa, Eýropa Odaǵy elderine jáne Soltústik Afrıkaǵa astyq jetkiziledi. Teńizben tasymaldaýdy arttyrý úshin Quryq portynda jańa astyq termınaly iske qosyldy. Jańa naryqtardyń azyq-túlikke suranys kólemi ulǵaıyp kele jatqanyn eskersek, Soltústik — Ońtústik jáne Transkaspıı baǵyty sııaqty halyqaralyq dálizderdiń róli arta túsedi. Qazaqstandy Eýrazııanyń negizgi kólik-logıstıkalyq ortalyǵy retinde qurý jónindegi strategııalyq mindet — meniń keıingi jyldardaǵy halyqaralyq deńgeıde júrgizip jatqan kelissózderimniń basty taqyrybyna aınaldy. Bul máselede atalǵan dálizderge yńǵaıly jol tabý jáne ishki logıstıkany jaqsartý óte mańyzdy. Sondyqtan aldaǵy alty jylda biz temirjol jelisin aýqymdy túrde jańǵyrtýdy kózdep otyrmyz. On bir myń shaqyrym temir joldy jóndep, bes myń shaqyrymnan astam jańa temir jol salý josparlanýda», — dedi Prezıdent.
Qasym-Jomart Toqaev qazirdiń ózinde «Darbaza — Maqtaaral», «Dostyq — Moıynty», «Baqty — Aıagóz» jáne «Almaty qalasynyń aınalma joly» sııaqty iri jobalar júzege asyrylyp jatqanyn aıtty.
«Bul Ortalyq Azııa men Qytaı baǵytyndaǵy júk tasymalynyń artýyna jol ashady. Avtokólik joldarynyń jelisin damytý baǵytynda aýqymdy jumystar atqarylýda. Máselen, jyl sońyna deıin «Astana — Balqash — Almaty», «Taldyqorǵan — Óskemen», «Aqtóbe — Qandyaǵash» jáne «Atyraý — Astrahan» avtomobıl joldarynyń qurylysy aıaqtalady», — dedi Memleket basshysy.