Memleket basshysy EQYU-nyń is basyndaǵy tóraǵasy Elına Valtonendi qabyldady
ASTANA. KAZINFORM – Qasym-Jomart Toqaev Uıymdy aımaqtyq jáne jahandyq qaýipsizdik salasyndaǵy kúrdeli kezeńde basqaryp otyrǵan Elına Valtonenniń qyzmetine qoldaý bildirdi. Bul týraly Aqordanyń baspasóz qyzmeti habarlady.
– Bıyl biz Helsınkı qorytyndy aktisiniń 50 jyldyǵyn atap ótemiz. Jarty ǵasyr ótse de, bul qujat egemendik, aýmaqtyq tutastyq jáne adam quqyqtaryn qurmetteý qaǵıdattaryn bekite otyryp, eýropalyq qaýipsizdiktiń negizi bolyp qala bermek. Qazaqstan osy qundylyqtardy berik ustanady, – dedi Qasym-Jomart Toqaev.
Prezıdent qazaq-fın baılanystarynyń jaı-kúıine joǵary baǵa berdi. Fınlıandııany Astananyń Skandınavııa aımaǵyndaǵy burynnan kele jatqan seriktesi dep atap, qarym-qatynasty odan ári jandandyrýǵa ázir ekenin málim etti.
Elına Valtonen EQYU Qazaqstanmen jáne Ortalyq Azııamen baılanysty damytýǵa basa mán beretinine toqtaldy.
– Qazaqstannyń halyqaralyq arenadaǵy abyroıyn bekitýge úlken kúsh-jiger jumsap otyrsyz. Sonyń arqasynda elińiz ózin aımaqta jáne álemde yqpaldy orta derjava retinde tanytty. Qazaqstan EQYU sekildi uıymdardyń jumysyna belsendi atsalysý arqyly jahandyq deńgeıdegi bedelin nyǵaıta beredi. Biz Sizdiń qazirgideı kúrdeli kezeńdegi, ásirese, ekonomıka jáne ekologııa salalaryndaǵy qyzmetińizdi joǵary baǵalaımyz. EQYU-nyń Astanadaǵy baǵdarlamalyq keńsesimen yntymaqtastyq aıtarlyqtaı tabysty damyp keledi, – dedi EQYU-nyń is basyndaǵy tóraǵasy.
Kezdesý sońynda Memleket basshysy Fınlıandııa Prezıdenti Aleksandr Stýbbqa sálem joldap, eki el arasyndaǵy dostyq pen yntymaqtastyqty nyǵaıtý úshin tyǵyz yqpaldastyqqa daıyn ekenin rastady.
Tájikstandaǵy parlament saılaýyn EQYU baıqaýshylary qadaǵalamaıtynyn jazǵan bolatynbyz.