Memleket basshysy eginnen mol ónim alý joldaryn atady
ASTANA. KAZINFORM — Eginnen mol ónim alý jáne ár gektarǵa shaqqanda onyń ózindik baǵasyn tómendetý óte mańyzdy. Bul týraly Aýyl sharýashylyǵy eńbekkerleriniń ІІІ forýmynda Memleket basshysy Qasym-Jomart Toqaev aıtty.
— Elimizdiń azyq-túlik qaýipsizdigi osy strategııalyq salaǵa tikeleı táýeldi. Bul belgili jaıt. Sondyqtan biz úshin eginnen mol ónim alý jáne ár gektarǵa shaqqanda onyń ózindik baǵasyn tómendetý óte mańyzdy. Bul túıtkildi sheshý joly túsinikti dep oılaımyn. Eske sala keteıin, buǵan egistiktiń ratsıonaldy qurylymy, sapaly tuqym, qoljetimdi tyńaıtqysh, ǵylymı dáldikke negizdelgen eginshilik jáne sýdy únemdi paıdalaný esebinen jetýge bolady, — dedi Prezıdent.
Memleket basshysy 2023 jyldan beri bıdaıdyń bitik shyǵýyna táýeldilikti azaıtyp, paıdasy áldeqaıda joǵary daqyldardyń úlesin kóbeıtý baǵytynda josparly jumys júrip jatqanyn eske saldy.
— Topyraq pen klımat jaǵdaıyn, sondaı-aq óńdeýshi kásiporyndardyń suranysyn eskere otyryp, egistikti ártaraptandyrýdy odan ári jalǵastyrǵan jón. Bıyl dıqandarymyzdyń mıneraldy tyńaıtqysh paıdalaný deńgeıi alǵash ret ǵylymmen negizdelgen qajetti mólsherdiń 65 paıyzyna jetti. Bul — aýyz toltyryp aıtarlyqtaı jetistik. Birneshe jyl buryn atalǵan kórsetkish nebary 20 paıyzdy quraǵan edi, — dedi Qasym-Jomart Toqaev.
Prezıdent otandyq tyńaıtqysh óndirisin damytýdyń mańyzy zor ekenin basa aıtty.
— Qazir paıdalanyp júrgen tyńaıtqyshtyń jartysyna jýyǵy shetten keledi. Jaǵdaıdy bulaı qaldyrýǵa bolmaıdy. Bul jóninde talaı aıttyq. Qazir Túrkistan oblysynda fosforly tyńaıtqyshtar shyǵaratyn zaýyt salynyp jatyr. Mańǵystaý oblysynda elimizdegi alǵashqy ammıak-karbamıd kesheniniń qurylysy josparlanǵan. Úkimet te osyndaı jobalarǵa qoldaý kórsetedi, — dedi Memleket basshysy.