Memleket basshysy EAEO elderi arasynda úzdiksiz logıstıkany qurý qajettigin málimdedi
ASTANA. KAZINFORM - Memleket basshysynyń paıymdaýynsha, syrtqy naryqtarmen baılanystyratyn ornyqty kólik júıesiniń bolýy uzaqmerzimdi ıntegratsııany jolǵa qoıýdyń negizgi sharty bolyp qala beredi.
– Búginde Eýrazııanyń kólik qurylymy Eýropa men Azııa, Soltústik pen Ońtústik arasyndaǵy tıimdi saýda baılanysyn qamtamasyz etip otyr. Alaıda aldaǵy onjyldyqtarda Eýrazııa aımaǵyndaǵy ınfraqurylymnyń tozǵany anyq sezile bastaıdy ári ony jańartý qajettiligi arta túsedi. Sondyqtan kólik jáne logıstıka ınfraqurylymdaryn jańǵyrtý jáne keńeıtý – mańyzdy másele. «Rels tóselgen jerde jańa múmkindikterge jol ashylady» dep beker aıtylmaǵan. Sol sebepti Qazaqstan 2030 jylǵa deıin 11 myń shaqyrym temirjolǵa jóndeý júrgizip, jańadan 5 myń shaqyrymnan astam temirjol salýdy josparlap otyr. «Bir beldeý, bir jol» jahandyq bastamasy aıasynda Qytaıdyń Sıan qalasynda Qazaqstannyń termınaly boı kóterdi. «Qytaı – Eýropa» baǵytynda konteıner arqyly tasymaldanatyn júktiń 40 paıyzyna deıin sol jerde jınaqtalady. Sonymen qatar Reseı, Qytaı, Ózbekstan, Qyrǵyzstan shekaralarynda jáne Kaspıı teńizinde 5 transshekaralyq kólik-logıstıka habyn iske qosý josparlanyp otyr, – dedi Prezıdent.
Qasym-Jomart Toqaev elimizdiń barlyq aýmaǵyndaǵy halyqaralyq avtomobıl ótkizý pýnktteri jappaı jańǵyrtyla bastaǵanyn aıtty. Osynaý keshendi ınfraqurylymdyq sheshimder Eýrazııa kúre joldaryn odan ári bir-birimen ushtastyrýǵa jáne múmkindikterdi keńeıtýge yqpal etedi.
– Qazaqstannyń temirjol salasyn damytý isi biryńǵaı tsıfrlyq ekojúıeni qurý arqyly tyń serpin alady. Sondaı-aq kelesi jyly temirjol tasymaly salasynda jasandy ıntellekt elementterin paıdalanýdy kózdep otyrmyz. Ozyq tehnologııalardy qoldaný tasymal tıimdiligin aıtarlyqtaı arttyryp, ózimizdiń jáne seriktesterimizdiń shyǵynyn azaıtýǵa múmkindik beredi. Bul tarıf saıasaty men keden rásimderin úılestirý, sondaı-aq Eýrazııanyń biryńǵaı tsıfrlyq dálizin qurý arqyly tutas logıstıka jelisin qamtamasyz etý úshin kerek. Naqty shara retinde taýarmen birge jiberiletin qujattardyń bárin QR-kodtar arqyly qashyqtan tekserý jáne tsıfrlyq qujattardy ózara taný mehanızmin engizýdi usynamyz, – dedi Memleket basshysy.