Memleket basshysy dinder sezine qatysyp jatqan Qytaı delegatsııasymen kezdesti

ASTANA. KAZINFORM – Memleket basshysy Álemdik jáne dástúrli dinder kóshbasshylarynyń VIІI sezine qatysyp jatqan Qytaı delegatsııasymen kezdesti. Bul týraly Aqordanyń baspasóz qyzmeti habarlady.

Qasym-Jomart Toqaev Dúnıejúzilik daoshylar federatsııasynyń tóraǵasy Lı Gýanfý, Qytaı býddashylar qaýymdastyǵy tóraǵasynyń orynbasary Tszın Bo jáne QHR Din isteri jónindegi bas basqarmasynyń ákimshilik departamenti bastyǵynyń orynbasary Sýn Veı bastaǵan delegatsııany qabyldady.

Prezıdent jahandyq órkenıetaralyq dıalogty damytýda Qytaıdyń syndarly ról atqaratynyn, sondaı-aq buǵan Tóraǵa Sı Tszınpın zor úles qosqanyn atap ótti.

Memleket basshysy beıbitshilik pen úılesim ıdeıasyn ilgeriletýde býdda jáne dao ilimderiniń orny erekshe ekenin aıtty. Sonymen qatar eki eldiń din isine jaýapty memlekettik organdary arasyndaǵy yntymaqtastyqtyń mańyzyna toqtaldy.

Kezdesý sońynda Qasym-Jomart Toqaev birlesken jumys Qazaqstan men Qytaıdyń máńgi strategııalyq seriktestigin nyǵaıtýǵa, ózara senimdi damytýǵa, beıbitshilik pen kelisimniń ortaq qundylyqtaryn dáripteýge yqpal etetinine senim bildirdi.

Aıta keteıik, álemdik jáne dástúrli dinder kóshbasshylarynyń sezinde Qasym-Jomart Toqaev forýmnyń bir top qatysýshylaryna memlekettik nagradalardy, Dinaralyq dıalogqa qosqan úlesi úshin Astana halyqaralyq syılyǵyn, Sezdiń qurmet medalin, sondaı-aq Іzgi nıet elshileriniń aıryqsha belgisin tabystady.

Memleket basshysy Ierýsalım Patrıarhy III Feofılmen kezdesti.