Memleket basshysy Danııanyń jańadan taqqa otyrǵan Korolin quttyqtady

Prezıdent Qasym-Jomart Toqaev Danııanyń jańadan taqqa otyrǵan Koroli X Frederıkti quttyqtap, jedelhat joldady, dep habarlaıdy Kazinform Aqordanyń baspasóz qyzmetine silteme jasap.   

«Sizdiń basshylyǵyńyzben Danııa óziniń ornyqty damýyn, halqynyń ál-aýqatyn eselep, halyqaralyq arenadaǵy bedelin arttyrý jolyndaǵy ıgi isterdi jalǵastyra beretinine kámil senemin. Qazaqstan men Danııa arasyndaǵy dostyq pen ózara qoldaýǵa negizdelgen jan-jaqty yntymaqtastyq birlesken kúsh-jigerimizdiń arqasynda aldaǵy ýaqytta da nyǵaıa túsetinine úmitim zor», – dep jazylǵan jedelhatta.

Sonymen qatar Prezıdent Qasym-Jomart Toqaev Patshaıym laýazymynan merziminen buryn óz erkimen ketip, taq murageri Frederık hanzadany Danııa Koroli retinde jarııalaǵan II Margretege de jedelhat joldady.

Memleket basshysy Qazaqstan men Danııa arasyndaǵy yntymaqtastyqty damytýǵa súbeli úles qosqany úshin II Margretege rızashylyǵyn bildirdi.