Memleket basshysy Danııanyń Syrtqy ister mınıstri Lars Lekke Rasmýssendi qabyldady
ASTANA. KAZINFORM - Aqordada Prezıdent Qasym-Jomart Toqaev Astanaǵa resmı saparmen kelgen Danııa Koroldiginiń Syrtqy ister mınıstri Lars Lekke Rasmýssenmen kezdesti, dep habarlaıdy Aqordanyń baspasóz qyzmeti.
Memleket basshysy Danııany Qazaqstannyń Soltústik Eýropa men Eýropalyq odaqtaǵy senimdi seriktesi dep atady. Kelesi jyly eki el arasynda dıplomatııalyq qarym-qatynas ornaǵanyna 35 jyl tolady.
– Biz Danııany Eýropanyń bedeldi jáne yqpaldy memleketi jáne senimdi seriktes retinde qarastyramyz. Ekijaqty yntymaqtastyǵymyzdyń áleýeti zor ekenine senimdimin. Atalǵan múmkindikterdi tolyq paıdalaný úshin taraptar osy baǵytta belsendi ári maqsatty túrde jumys isteýi qajet, – dedi Qasym-Jomart Toqaev.
Kezdesýde saýda-ekonomıkalyq jáne ınvestıtsııalyq baılanystardy damytýdyń oń dınamıkasy atap ótildi.
Bul rette, Prezıdenttiń aıtýynsha, ózara yqpaldastyqty tereńdetý múmkindigi jetkilikti.
Memleket basshysy Carlsberg kompanııasynyń Almaty oblysynda mańdaıaldy ınvestıtsııalyq jobany qolǵa alǵanyn quptap, kásiporynnyń Qazaqstanda tamaq ónerkásibin ilgeriletýge qosqan úlesin joǵary baǵalady.
Danııa syrtqy saıasat vedomstvosynyń basshysy aldaǵy Qazaqstan Táýelsizdiginiń 35 jyldyǵymen quttyqtap, osy jyldar ishinde elimizdiń aıtarlyqtaı tabystarǵa qol jetkizgenine toqtaldy,
Budan bólek, ol Danııanyń Qazaqstanmen saıası dıalogty odan ári nyǵaıtýǵa jáne saýda-ekonomıkalyq yntymaqtastyqty jandandyrýǵa nıetti ekenin rastady.
– Qazaqstan Ortalyq Azııadaǵy ekonomıkasy iri el sanalady. Munda Danııanyń kóptegen kompanııasy jumys isteıdi. Olar osy seriktestikti aldaǵy ýaqytta keńeıte túsýge qyzyǵýshylyq tanytyp otyr, – dedi Danııa Syrtqy ister mınıstri.
Budan bólek, Qasym-Jomart Toqaev pen Lars Lekke Rasmýssen kólik-logıstıka, tsıfrlyq transformatsııa, jasandy ıntellekt, asa mańyzdy mıneraldar, aýyl sharýashylyǵy jáne sý qaýipsizdigi salalaryndaǵy yqpaldastyqty nyǵaıtý perspektıvasy jóninde pikir almasty.
