Memleket basshysy Cerberus Capital Management kompanııasynyń bas atqarýshy dırektoryn qabyldady

NЬıÝ-IORK. KAZINFORM — Memleket basshysy Cerberus Capital Management kompanııasynyń bas atqarýshy dırektory Frenk Brýnony qabyldady. Bul týraly Aqordanyń baspasóz qyzmeti habarlady. 

Qasym-Jomart Toqaev Cerberus Capital Management kompanııasynyń ınvestıtsııalardy basqarý salasyndaǵy jahandyq kóshbasshylyǵyn joǵary baǵalap, Transkaspıı halyqaralyq kólik baǵytyn damytý aıasyndaǵy ınfraqurylymdyq jobalardy qarjylandyrý nıetin quptady.

Prezıdenttiń aıtýynsha, kompanııanyń strategııasy Qazaqstannyń ulttyq ekonomıkany ártaraptandyrý jónindegi basymdyqtaryna saı keledi. Elimiz kólik-logıstıka ınfraqurylymyn damytýǵa ınvestıtsııa tarta otyryp, baǵyttardyń ótkizý múmkindigin keńeıtýge qarqyndy túrde kiristi.

Sondaı-aq Memleket basshysy Vashıngtonda Ázerbaıjan men Armenııa arasyndaǵy tarıhı kelisimge qol qoıylýy Orta dálizdiń mańyzdy saýda joldarynyń biri retindegi mańyzynyń arta túsýine oń áser etetinin atap ótti. Sońǵy bes jylda Transkaspıı halyqaralyq kólik dálizi arqyly tasymaldanǵan júk kólemi alty ese artty.

Budan bólek, Memleket basshysy kompanııanyń tehnologııalyq platforma men tsıfrlyq ekojúıeni taratý salasyndaǵy aýqymdy tájirıbesin atap ótip, Qazaqstandaǵy tsıfrlyq bastamalarǵa qatysýdy usyndy. 

Cerberus Capital Management kompanııasynyń bas atqarýshy dırektory Frenk Brýno Orta dálizdi damytý áleýetin joǵary baǵalaıtynyn aıtty.

 — Prezıdent myrza, Sizge jáne osy jobaǵa atsalysqan barshaǵa alǵys aıtamyn. Komandańyzdyń kásibı deńgeıi joǵary. Sonymen qatar ekonomıkalyq ósimdi qamtamasyz etý jónindegi josparlaryńyzdy erekshe atap ótkim keledi. Qazaqstanmen birge Orta dálizdi damytý áleýetin, logıstıka jáne telekommýnıkatsııa salalaryndaǵy múmkindikterdi joǵary baǵalaımyz, — dedi ol. 

Aıta ketelik Prezıdent Amazon kompanııasynyń aǵa vıtse-prezıdenti Devıd Zapolskıdi qabyldaǵan edi.