Prezıdent CATL kompanııasynyń Qazaqstanda akkýmýlıator zaýytyn salý bastamasyn qoldady
ASTANA. KAZINFORM — Prezıdent Qasym-Jomart Toqaev Contemporary Amperex Technology Co. Ltd. (CATL) dırektorlar keńesiniń teńtóraǵasy Pan Tszıanmen joǵary tehnologııa salasyndaǵy uzaqmerzimdi yntymaqtastyq perspektıvasyn talqylady.
Aqordanyń baspasóz qyzmetiniń habarlaýynsha, Memleket basshysy CATL kompanııasynyń elimizde akkýmýlıator batareıalaryn shyǵaratyn zaýyt salý bastamasyn quptady.
Bul kásiporyn Ortalyq Azııada osyndaı aýqymdaǵy alǵashqy óndiris ornyna aınalýy múmkin.
Prezıdent Qazaqstannyń shıkizatty óńdeýden bastap daıyn ónim shyǵarýǵa deıingi tutas óndiristik tsıkldi qalyptastyrýǵa múmkindigi tolyq jetetinin atap ótti.
Pan Tszıan CATL Qazaqstandy kompanııa qyzmetiniń basty baǵyttary boıynsha birlesken jobalardy júzege asyratyn mańyzdy ári senimdi seriktes retinde qarastyratynyn jetkizdi.
Sonymen qatar onyń kompanııasy Qazaqstannyń 2060 jylǵa qaraı kómirtegi beıtaraptyǵyna qol jetkizý jónindegi strategııalyq maqsatyna járdemdese alatynyn aıtty.
Contemporary Amperex Technology (CATL) 2011 jyly qurylǵan, elektromobılderge arnalǵan akkýmýlıator óndirisi boıynsha álemdik kóshbasshy sanalady (naryqtyń 40 paıyzy) jáne Qytaıdaǵy belgili ári iri kompanııalar qataryna kiredi. 2025 jyldyń qorytyndysy boıynsha CATL akkýmýlıator ónimderin satý kólemi 661 GVt-saǵatqa jetip, tabys 62,6 mıllıard dollardy, sonyń ishinde taza paıda 10,6 mıllıard dollardy qurady.
Eske salaıyq, buǵan deıin Memleket basshysy Qasym-Jomart Toqaev Xiaomi korporatsııasynyń prezıdenti Lý Veıbınmen kezdeskenin jazǵanbyz.
